المخابراتي الوسيم.. إيهاب نافع الرجل الذي فعل ما يحلو له

 

الجزء الأول 

خلينا نبدأ القصة من اولها..

القصة تبدأ لما ولد شاطر اسمه محمد نافع، بعتوه يدرس طب العيون في في سويسرا وتحديدا لوزان.. دكتور ومبسوط ماديا ووسيم.. طبيعي يقع في حب واحدة زميلته سويسرية.. فبعت لابوه صورتها.. وقاله يا ابويا انا عايز اتجوز زميلتي.. انا خطبتها ومستني موافقتك يا اخويا ما انت خطبتها موافقتي ايه بقى.. فابوه قاله على عيني.. بس ممكن تيجي الاول عشان نرتبوا نفسينا.. بس والنبي تعالى من غير خطيبتك.. عشان عايزك في موضوع مهم..

الدكتور محمد نافع نزل البلد في مركز ميت غمر لوحده، خير يا ابويا.. قاله الف مبروك.. قاله على خطيبتي السويسرية.. قاله لا انا خطبتلك واحدة هنا.. بنت محمد باشا ذو الفقار تركية .. واسمها سهل جدا.. اسمها “برسيوز”.. فقاله طيب والسويسرية… قاله سويسرا دي نجيب منها شوكولاتة.. نجيب منها مدربين يتخانقوا مع كهربا.. نودي فيها فلوس الحرامية بتوع البلد.. انما نتجوزها منها لا يمكن ابدا..

وبعدين شوف برسيوز مش يمكن تعجبك.. فقاله ماشي.. الولد كان مطيع جدا لابوه، الدكتور نافع راح قابل برسيوز.. وعجبته واتجوزها من غير ما يقول “بم”، فسألها هو برسيوز يعني ايه.. قالتله يعني نفيسة.. فضحك وقالها البلدي يوكل..

المهم اتجوزها بمهر 150 جنيه افرنجي، وخلف بنت سماها تحية، وولد سماه اسم مركب، اللي هو محمد ايهاب، زمان كان فيه موضة الاسماء المركبة انك تسمي الابن باسمين.. يعني محمد فوزي ليه 24 اخ.. كل واحد فيهم ليه اسمين.. نجيب محفوظ دا اسمه لوحده.. هو لوحده اسمه نجيب محفوظ.. وهكذا..

العيال كان وشهم حلو عليه، واشتغل في مصر ونجح جدا، لدرجة انه بقى دكتور الملك فاروق، السلطان حسين كامل، الملك عبد العزيز ال سعود..

ومرة الملك عبد العزيز، جاله مرض في عينيه، فطلب من السلطان حسين كامل، دكتور عيون شاطر، فبعتله الدكتور بتاعنا، فقعد في السعودية 3 شهور متواصلين، وبقى طبيب العيلة المالكة..

ولازم كل سنة يقعد 3 شهور في السعودية، و 3 شهور في مصر، فطبيعي ياخد عياله، ومنهم ابنه محمد ايهاب، اللي هنقوله يا ايهاب عشان نختصر.. ايهاب كان طفل جميل وشاطر، فالملك عبد العزيز اعجب بيه، وقاله بتحب ايه يا ولد.. قاله بحب الخيل.. وخلصت الاجازة، والدكتور مروح مصر.. فالملك قاله.. انا بلغت فوزان الفوزان سفير السعودية في مصر يدي ولدنا ايهاب 3 خيول عربية اصيلة..

مش بس كدا.. اداله عقد من اللولو.. وقاله دا للست والدتك.. وكمان كيس حرير ابيض بخيط اخضر.. ولما فتحه لقاه مليان جنيهات دهب.. الرحلة كانت سعيدة وناجحة ومليانة بالهدايا.. لكن الخبر الوحش ان الاب جاله سرط**ان في المثانة..

والحقيقي ممكن تسألني وتقولي هو ايهاب دا مكانش مقلق من الملك عبد العزيز، يعني ملك وهو لسه طفل.. هو نفسه بيقول انه عادي.. لانه متعود على قعدة الملوك.. لان ابوه دكتور الملك ومن شلة الملك فاروق فياما قابله.. وبيحكي موقف يموت من الضحك.

في مرة كان الملك فاروق بيلعب كوتشينة مع صحابه ومنهم الدكتور ابو ايهاب.. وفي اللعب كان الملك فاروق بيلعب معاهم على فلوس.. على سبيل التسلية..

فقالهم 4 رواه (يعني شايب – ملك).. وراح لامم الفلوس.. فراح الدكتور محمد نافع قاله.. بس دول 3 رواه بس.. فالملك فاروق قاله وانا الرابع.. وهنا كلهم ضحكة بس هو روح متغاظ انه خسر بخفة دم الملك دي..

بس الصبح لما فتح الجرنال، لقى الملك اداله لقب بيك.. والخبر منشور في الجرنال..

الحقيقة ان الولد ايهاب، مش هيقول لابوه على كيس الدهب، لان الملك عبد العزيز، قاله دي ليك انت.. وابوه مسالهوش على حاجة.. عشان الفلوس دي يعمل بيها اول حاجة مجنونة من الحاجات الكتير اللي هيعملها..

بس احنا هنفضل نقول الدكتور محمد نافع وابنه محمد ايهاب.. احنا لازم نختصر.. فنقول ايهاب نافع.. بس دا بكرا إن شاء الله.

 

ايهاب نافع – المخابراتي الوسيم 2

 

احنا وقفنا ان ايهاب معاه كيس الدهب اللي خده من الملك عبد العزيز، كيس الدهب دا ثروة، وهو لسه طفل يعني، المهم سافر مع والده مارسيليا وبعدها راحوا باريس.. وهو برضه معاه كيس الدهب.. وابوه ميعرفش..

نزلوا في فندق اسمه جورج الخامس.. في شارع سان جورج، كان الصبح يروح مع ابوه المتشفى يعملوا الفحوصات وبالليل كان الدكتور نافع بيروح يقابل اصحابه.. فالطفل ايهاب لقى معاه فلوس وهو قاعد في الفندق مبيعملش حاجة..

الفضا خلاه اتكلم مع موظف ريسيبشن ازيك وعامل ايه.. بقولك ايه متعرفش حد بيبيع عربيات.. قاله دا فيه معرض للعربيات الحديثة موجود لزق في الفندق.. وقاله لو رايح ابعت معاك حد.. وقد كان..

 

في المعرض شاف عربية كاديلاك موديلة 49.. والعربية دي كانت وهم.. وامكانياتها وقتها سابقة عصرها.. القزاز كهربا.. الكراسي كانت بتتحرك اوتوماتيكي.. والمرايات اوتوماتيك… كل دا سنة 1949..

 

المدير بتاع المعرض بص لايهاب بصات هو انت عايز تاخد العربية دي.. وشوية كدا وهيقوله اجري يا شاطر من هنا.. فايهاب اللي كان عمره 14 سنة بس.. يعني عيل صغير..

 

فالمدير قاله العربية تمنها 1250 جنيه استرليني.. فايهاب قاله ماشي… راح الفندق.. جاب الدهب وباعت تلته بالظبط طلع بازيد من تمن العربية.. وراح اداهم لصاحب المعرض.

فاداله العربية وعمله عقد بيع مؤقت..  ايهاب اللي عنده 14 سنة ونص.. قول 15 كان معاه رخصة قيادة ازاي.

قالك والدته اللي هي قلنا اسمها نفيسة.. اتصلت باميرلاي اسمه شكري وكان مسئول عن المرور في مصر.. وقالتله طلع للواد رخصة.. قالها الواد صغير.. قالتله بس سواق شاطر.. فزوروا تاريخ ميلاده وعملوله رخصة…

 

كدا معانا الرخصة ومعانا العربية.. ناقص ايه.. برافو عليك.. المغامرة.. بس فيه مشكلة صغيرة.. ابوه اصلا ميعرفش كل دا..

رجع الاب لقى ايهاب بيقوله محضرلك مفاجاة.. قاله ايه.. فتح عينك.. انا اشتريت عربية.. قاله جبت فلوسها منين دي.. قفحكاله قصة الدهب، طبعا زعل قوي، وطلب منه يرجع الدهب، بس ايهاب خلاص كانت امكانيات العربية جننته..

 

 ايهاب قال لابوه ارجعها ليه.. قاله عشان لما انت 14 سنة وهتركب كاديلاك.. لما تبقى دكتور مشهور زيي هتركب ايه.. انت عايز تجيب ليفل الوحش من اول محاولة.. كدا بتاع المحل يخسر.. فايهاب قاله هركب رولز رويس.. هشارك حمو بيكا على حتى اكس سيكس استعمال محمد رمضان..

الاب رفض وقاله انا رايح المستشفى، ارجع الاقيك رجعتها.. ايهاب قاله حاضر بس ناوي على الغدر.  راح باع باقي الدهب وبقى معاه ثروة محترمة.. فساب لابوه جواب انه راجع مصر على السفينة سبريا”..

 وبيحكي ايهاب انه كان بيستريح في الطريق قدام الفنادق ويركن العربية فتيجي البنات تتلم عليها.. فينقي احلى 3 بنات ويطلع بيهم رحلة.. ما هو معاه كاديلاك قزاز كهربا.. وعلى راي سعيد صالح المقررات هناك سهلة.. المقرر تقوله يا مقرر يجي علطول..

فضل مقضيها بنات وعربيات وفرتكة في فلوس الدهب.. لحد  ما وصل مرسيليا اللي هياخد منها السفينة… وصل مرسيليا في قد ايه بقى.. 14 يوم.. يعني لو كان رايح مشي كان وصل اسرع بكتير.. .. في الـ 14 يوم كانت لفت اوروبا كلها ومن غير ما يكون مع الشنجن..

 

 ايهاب اللي كان معاه ثروة متقلش عن 3 الاف جنيه وصل ميناء الاسكندرية بعد 4 ايام ومكانش معاه  غير 18 جنيه.. طيب وايه يعني ما دا رقم حلو يوصله بيتهم..

 لا ما هي المشكلة ان الجمارك عايزين 220 جنيه..

 

فاتصل بامه.. قالتله انت هببت ايه.. دا ابوك حالف يطلقني لو اديتك فلوس.. قالها والعمل.. قالتله سيب العربية في جمرك.. وخد ايصال انها وديعة.. لحد ما نتصرف..

 

وصل البيت فعلا، وامه انبته شوية بس كانت  من جواها فرحانة ان ابنها طلع جو حطاب وبيلف البلاد بالعربية.. قالتله هخلي خالك احمد ذو الفقار باشا يخلصلك موضوع الجمارك دا في ثانية الا تلت..

 

جات العربية، وايهاب شايف نفسه انه اشيك واد في حيهم.. وهو كان كدا فعلا يعني.. فامه قالتله بيعها قاله يا امي دي عربية قيمة قوي.. قالتله طيب خد العربية وروح سلم على الملك فاروق عشان اتصل وسال على ابوك.. روح طمنه..

 

فاتصل ايهاب بكريم ثابت.. وطلب ميعاد يقابل الملك فاروق.. وكريم ثابت لمن لا يعرف كان مستشار إعلامي للملك فاروق ودي مهنة مستحدثةز. يعني هو اول واحد شغلها عند الملك.. وليه كتابين عن الملك فاروق “فاروق كما عرفته”، و”الملك فاروق”..

 

نرجع لايهاب، اللي راح قابل كريم ثابت، فحكاله ايهاب قصة العربية .. وقاله انا فاضلي سنة واخش كلية الطيران الحربية وبفكر اطلب سلفة من الملك.. فضحك كريم ثابت قوي.. وقاله لازم تحكي القصة دي للملك يا ايهاب لازم..

 

المهم دخل للملك، فالملك قاله بالفرنساوي، عامل ايه ولد ايهاب.. فقاله كويٍس.. وراح حاكيله قصة العربية.. الملك قاله يا كريم.. ابعت عربية بتاعت ولد ايهاب يجي حالا.. جيب عربية ولد ايهاب على التريلا.. وفعلا جات العربية..

 

وخد المفتاح من ايهاب، ركب العربية عجبته جدا، فقال لكريم ثابت عايزين 6 عربيات كاديلاك .. 3 كشف و3 ليموزين.. وكله اسود في احمر… وقال لايهاب.. انت تاخد العربية الفورد دي.. ولما تيجي العربيات الكاديلاك من برا ابقى تعالى خد بتاعتك.. فايهاب راح ياخد سلفة من الملك عشان العربية رجع من غير العربية..

 

بس معاه عربية فورد وموديل السنة.. الغريب ان ابوه حس ان ايهاب انتصر عليه.. لان بعد قرار الملك العربية مش هترجع تاني..

 

بس انت المفروض تبقى فهمت شخصية ايهاب.. شخص غني.. بيقابل ملوك من وهو طفل.. بيجيب عربية من فرنسا.. منفتح على كل الثقافات.. وبيصرف وميهموش.. ووسيم.. وهيبقى طيار حربي.. المواصفات دي تخلي ان هو اللي عليه العين والالي..

 

لكن الملك فاروق كان بيتعمد يغيظ ايهاب.. وبالعربية بتاعته.. ازاي دا ومين طاطا زكي اللي كانت بتركب العربية مع فاروق.. وازاي ايهاب هيتخلص من الـ 3 احصنة النحس.. وليه هما نحس.. دا بكرا إن شاء الله.

 

ايهاب نافع – المخابراتي الوسيم 3

 

بيحكي ايهاب ان الملك فاروق بعد ما خد منه العربية كان بيتعمد يغظيه، وبيقول ان كان فيه ست جارة ايهاب اسمها طاطا زكي).. وكان الملك بيعدي ياخدها من بيته بالعربية الكاديلاك.. فايهاب يكون واقف يبصلهم.. وعينه هتطلع على عربيته اللي الملك أخدها.. فالملك فاروق يلاحظه، فيضربله كلاكس، وحتى لو مش واقف كان بيتعمد يضربله كلاكس، ويقوله: “عربية حلوة ولد إيهاب.. عربية شيك يا ولد”..

 

وبيقول فضلت العربية فعلا مع الملك، لحد ما جاب الست عربيات اللي طلبهم، ورجع لايهاب عربيته، كدا باقي من عطية الملك عبد العزيز الـ 3 احصنة.. ايهاب كان حاطط الاحصنة في نادي الجزيرة وبيدفعلهم ارضية.. وقرر يشارك بيهم في سباقات الخيل في مصر الجديدة والجزيرة.. وجيس وات كل السباقات اللي دخلتوها الخيول دي خسرتها.. فايهاب لقى نفسه بيدفع ارضية واكل وشرب وكمان بيخسر السباقات.. فقرر يبيعهم.. لمين بقى.. ليوسف وهبي..

 

اتصلت ام ايهاب الست “نفيسة”، بيوسف وهبي، وقالتله ميلزمكش 3 خيول يا يوسف بيه، فقالهم يلزموني، ودفع فيهم 60 جنيه، طيب حلو.. شربتها يا يوسف بيه… دول بيخسروا كل السباقات..

 

متهور واهوج.. هو ايهاب اللي كان ناحس الخيول.. لان الخيول بعد ما اشتراهم يوسف وهبي كسبوا السباق.. واحد المركز الاول.. وواحد التاني وواحد السادس.. وكسب يوسف وهبي منهم في اليوم دا بس 600 جنيه.. او كما قالت امي “الفقر عارف صحابه”.

 

هنا قد يخطر في بالك.. ابو ايهاب دا دكتور الملك وصاحبه اللي بيلاعبه كوتشينة.. لما تقوم الثورة هيحصل فيه إيه.. فكر كدا وقولي..

 

متفكرش خلاص الوقت خلص.. ابو ايهاب اصلا مات قبل الثورة.. في سنة 1950.. والقصة ان ابو ايهاب زي ما قلتلك كان عنده سرطان.. ووصل للمرحلة التالتة.. فوفاته كانت مسالة ايام.. وايهاب في سنة تالتة ثانوي.. وعلى مشارف الكلية يعني..

 

وكان كل يوم يسهر جنبه يصلي ويدعيله، وفي يوم صلى الفجر، فلقى ابوه بيقوله يا ايهاب.. فراح قاله نعم يا بابا.. قاله صليت.. قاله اه.. قاله ودعيتلي.. قاله دعيت ربنا يشفيك.. فابوه قاله: “يا ايهاب.. انت كبرت وفاهم.. انا بموت يا بني .. انا كل يوم الدكتور يجي يديني مسكن عشان اعرف استحمل الالم.. ادعيلي اموت وارتاح.. عايز ارتاح بسرعة يا ايهاب”.. قالها وبكى.. فايهاب لقى نفسه بيبكي..

 

وقاله ان شاء الله هتعيش يا بابا.. هدعيلك تخف.. فقاله يا بني.. انا دكتور وعارف انا بيحصل في جسمي ايه.. انا بتعذب يا بني.. لو بتحبني فعلا تدخل كلية طب دي رغبتي.. ولو فشلت فيها ابقى ادخل اللي انت عايزه.. وحافظ على امك دي بتحبك قوي..

 

هنا لك ان تتخيل حالة الطفل ايهاب في الوقت دا.. لكن ابوه طلب منه طلب اصعب.. قاله افرش السجادة وصلى قدامي.. وقول بصوت عالي.. يا رب خد بابا.. يا رب ريحه.. ادعيلي ارتاح واموت بصوت عالي.. وفعلا فرش السجادة ودعى وهو بيبكي.. وفي الصبح ابوه مات..

 

انا بكتب دا، وبعترف اني كل ما بكتب عن الموت، بتخنق وبتقفل وبفتكر يوم وفاة ابويا.. المشهد دا مبيروحش من بالي ابدا.. (عدى عشر سنين عليه.. وبيمر قدامي كانه امبارح)… كتبت المشهد دا في رواية ما بعد رحيله.. وكان مشهد مؤلم.

 

بيحكي ايهاب عن ابوه، انه كان راجل خير وعطوف على الناس، وكان ليه عيادتين، واحدة في جاردن سيتي بيعالج فيها علية القوم والقادرين بفلوس، وعيادة في قليوب، بيعالج فيها الناس ببلاش، وكان بيقسم وقته بينهم..

 

ايهاب كان نفسه يدخل كلية طيران.. او الكلية الجوية.. هو بيحب الطيران قوي ومهووس بيه.. لكن ابوه كان عايزه يدخل كلية طب.. فدخل فعلا كلية طب.. وتعمد يسقط نفسه لانه مش بيحب الطب..

 

الفكرة ان امه بعد وفاة ابوه، رفضت ان ابنها يسيب الطب اصلا، فقالتله خليك تسقط فيها لحد ما تنجح، ومتعرفش انه كان بيبقى عارف الاجابة وبيسيب الورقة فاضية عشان يسقط، فراح مزور امضة امه عشان يسحب الملف من كلية الطب ويروح الكلية الحربية..

 

يروح الكلية الحربية ليه.. ما يروح الكلية الجوية.. هو قال ان الكلية الحربية خطوة.. وبعد كدا يروح الجوية.. والواد يعني معاه واسطة جامدة.. دا راجل الملك كان واخد عربيته وعمال يخمس بيها مع طاطا..

 

المهم يعني، دخل الكلية الحربية، وكان واد وسيم، ورياضي، وطول بعرض، فدخل فريق السلة، وكرة الماء، وكان لاعب كويس، فصارح مدربه انه عايز يروح الكلية الجوية، فقاله لا.. انت خليك هنا عشان لو مشيت هنخسر، ورفض يديله ورقه عشان يروح الكلية الجوية، فراح لخالد محيي الدين وحسين الشافعي، وكانوا الاتنين واسطته…

 

وعشان تعرف الاتنين تقال ازاي.. فخالد محيي الدين دا دخل في خلاف مع عبد الناصر نفسه سنة 1954.. وبعدها استقال من الظباط الاحرار وعاش في سويسرا ورجع مصر وعمل حزب التجمع.. ومات 2005.. وحسين الشافعي دا كان نائب رئيس جمهورية مصر العربية في الفترة من 1963 إلى 1975 وليه حكايات كتير قوي اكتر مما تتخيل، يكفي تعرف ان هو اللي حاكم سيد قطب، وهو اللي حاكم رجالة المشير عامر، ومليون منصب تاني.. وبرضه مات سنة 2005.. الغريب ان ايهاب مات بعدهم علطول في 2006..

 

المهم يعني، راح ايهاب الكلية الجوية في بلبيس.. وبلبيس دي في الشرقية واتقبل بعد 40 يوم بس من الثورة.. مين كان استاذه في الكلية الجوية.. برافو عليك.. محمد حسني مبارك.. ودا ليه قصة كبيرة قوي مع ايهاب.. بس دا بكرا إن شاء الله..

 

 

ايهاب نافع – المخابراتي الوسيم 4

 زي ما وقفنا امبارح.. ايهاب دخل الكلية الجوية في بلبيس.. كواحد من ضمن 64 طالب في الدفعة.. وكان معاهم في الكلية استاذ اسمه حسني مبارك.. محمد حسني السيد مبارك..

 

محمد حسني مبارك اصلا من المنوفية، ابوه موظف في محكمة طنطا، وامه ربة منزل، خلص ثانوية عامة من مدرسة المساعي المشكورة الثانوية في شبين الكوم، ودخل الكلية الحربية، واتخرج سنة  1949.. فاتوزع ظابط في سلاح المشاة، في اللواء الثاني الميكانيكي لمدة 3 شهور.. والراجل سستم حياته انه ظابط مشاه.. طيب كويس..

 

فكلية الطيران اعلنت عن قبول دفعة جديدة من خريجي الكلية الحربية، عشان يشتغلوا في الكلية ويتعلموا علوم الطيران، فاتقدم حسني مبارك واتقبل مع 11 ظابط قبلتهم الكلية،ً واتخرج في مارس 1950… فاتعين في الكلية الجوية.

 

بيحكي ايهاب نافع ان محمد حسني مبارك كان بيعيش جوا الكلية، هو عموما مبارك كانت علاقته سيئة باسرته، وكان نادر الزيارة لبلده اصلا (ابوه مت سنة 1960 في السنة اللي خرج فيها عالمعاش، وامه ماتت سنة 1978 وهو نائب للرئيس).. ورفعت امه دعوى رقم 20 لسنة 1960 أحوال شخصية محكمة شبين الكوم الجزئية عليه لمطالبته بالانفاق عليها.. (بحسب المحامي نبيه الوحش واللي نشر تفاصيل القضية في الفجر)..

 

 ايهاب بيشكر في مبارك جدا وبيقول انه كان شخص خلوق وبتاع شغل، ومرة عزمهم على السينما، وقبل السينما عزمهم على كافتيريا ياكلوا، فلاحظ مبارك ان فيه ولد بيبص عليهم وهما بياكلوا، فخده جابله اكل، فلقة معاه 3 اخواته، فجابلهم كلهم اكل..

 

وبيحكي قصة تانية، ان كان معاهم طيار اسمه الفطايري، والفطايري طار بالطيارة فوق قريتهم، فرحان بنفسه وكدا، فراح خابط بالطيارة في شجرة، فالجناج بتاع الطيارة اتحرك 12 سم، فكلم مبارك في اللاسلكي، وقاله يا فندم انا خبطت في شجرة، فمبارك قاله ولا يهمك، وفضل معاه ع اللاسلكي لحد ما هبط في قاعدة بلبيس الجوية.

 

وبيقول ايهاب ان مبارك كان شخص لطيف جدا، وكان بيحرص انه يطمن عليهم وهما نايمين، ويصحيهم بنفسه الصبح، بص هو طبعا دي شهادته وهو حر فيها، بس المذكرات دي اتكتبت ومبارك موجود في السلطة، فانا لا اعول عليها في النقطة دي..

 

لكن بيقول ان مبارك كان حريص ان الطلبة تتعلم اللغة العبرية، وجابلهم فعلا واحد يعلمهم اللغة العبرية، لكن بيقول ان مبارك حبسه فوق 27 مرة اثناء دراسته في الكلية الجوية، لانه كان شقي جدا..

 

ايهاب بيعكس جانب من الرفاهية مكانش موجود قوي عند طلبة الكليات العسكرية، انه كان بيسافر برا مصر في اجازات الصيف، وبيقول انه مرة طلب من مبارك يديله الاذن يسافر برا، فمبارك قاله متستعجلش ليه تسافر وتتكلف وبكرا تطلع ماموريات وتتفسح على حساب الدولة، فايهاب قاله والنبي توافق، فوافقله فسافر ايهاب لسويسرا..

 

وبيحكي ايهاب انه راح سويسرا مع ظابط زميله اسمه فؤاد محرم، لان جدة فؤاد كانت سويسرية، فراحوا فعلا، وقضوا 10 ايام في بلد جنب العاصمة، وبعدها راحوا جنيف، ففؤاج محرم غاب 48 ساعة، ورجع لايهاب ببنت حلوة جدا، وقاله اعرفك خطيبتي.. خطبتها من اهلها.. فايهاب قاله ازاي تتجوز من اجنبيه.. انت ظابط ودا ممنوع..

 

معلومة على جنب، فيه وظايف مينفعش تتجوز فيها من اجنبية غير بموافقة الدولة، تقدم طلب، والدولة توافقلك او لا.. زي السفراء والعاملين في الخارجية، يعني في 2018، اتنشر خبر في الجريدة الرسمية.. بموافقة رئيس الجمهورية  على زواج تامر فتحي عبدالسلام حماد، المستشار بالسلك الدبلوماسي والقنصلي، من الآنسة لبنى أسامة محمد علي سلطان، وكانت سورية الجنسية..

 

المهم يعني، عشان مندخلش في امور جانبية مع ان الحلقة كلها امور جانبية، ففؤاد محرم، قال لايهاب انت بس متقولش لحد وانا لما اتخرج هظبط اموري، لكن الغريب ان ايهاب اول ما نزل قال لمبارك على الموضوع، فمبارك طبق القانون وفصل الواد من الكلية الجوية سنة 1954.. وهسيبلك انت التعليق..

 

المهم اتخرج ايهاب من كلية الطيران في سنة 1955.. واتعين في الماظة، وبعد 24 ساعة من تعيينه، جات دفعة من الطيارين السوريين لمصر وعددهم 11 طيار، تخيل يطلع مين من ضمن الطيارين السوريين، برافو عليك.. ولا مش برافو عليك انت معرفتش اصلا.. طلع حافظ الاسد ابو بشار الاسد.. وبيقول انه اتدرب مع حافظ الاسد وعملوا مأمورية وضربوا طيارات العدو..

 

لكن ازاي ايهاب اللي لسه متخرج، يختاروه يبقى قائد طيارة جمال عبد الناصر نفسه، مش غريبة دي.. غريبة لكن ليها حكاية..

 

بس هنا خلى بالك، ايهاب شخص تقريبا بيتكعبل في وسايط ورتب، يعني استاذه في الكلية يطلع حسني مبارك، صحاب عيلته خالد محيي الدين، وحسين الشافعي، يقابل طيار سوري، فيطلع حافظ الاسد.. شخص وسيم، ابن ناس، غني، وعلاقاته كويسة، كل دي مؤهلات كويسة لعريس الفنانة ماجدة.. لا مش ماجدة كل دي مؤهلات كويسة.. لشخص مخابراتي من الدرجة الاولى.. بس دا هيحصل ازاي.. وهيتم ازاي.. بكرا إن شاء الله.. عشان احمد عايز ثراولة.. وكما قال الريس متقال “الثراولة بتاع الثراولة”.

 

#بهاء_حجازي

 

 

الجزء الخامس

ايهاب نافع –  المخابراتي الوسيم 5

 

وقفنا امبارح ان ليه طيار زي ايهاب نافع يبقى هو الطيار اللي بيسوق طيارة عبد الناصر، بص هو ايهاب دخل الكلية الجوية مع بداية الثورة سنة 1952.. وطلع منها سنة 1955..

 

ولان ناس كتير مبيقروش تاريخ، وميعرفوش كتير عنه، فخليني اقولك شوية ومضات بسيطة عن الفترة دي..

 

الملك لما مشي.. مشي بعد ما مضى وثيقة التنازل عن العرش لابنه.. فمصر لسه ملكية.. وهنعمل مجلس وصاية على العرش اللي هو بيحافظوا على العرش لحد ما فؤاد ابن فاروق يكبر.. وبرضه عندك الناحية التانية مجلس قيادة الثورة بقيادة محمد نجيب..

 

بس هو يعني ليه اصلا نسلم البلد لاحمد فؤاد ابن فاروق لما يكبر، وليه ملكية.. فقالك كرسي في الكلوب وسنة 1953.. اعلن مجلس قيادة الثورة ان مفيش ملكية خلاص.. وبقينا جمهورية.. فبالتالي مفيش مجلس عرش.. ومفيش مجلس وصاية ومفيش فكة.. تاخد بالباقي لبان..

 

ومسك محمد نجيب حكم مصر وبقى اول رئيس لجمهورية مصر العربية.. بس برضه الظباط الاحرار موجودين..

 

في الفترة من 1952 كان فيه تلميع لشخصية محمد نجيب.. نلميع انه المنقذ والقائد والمخلص.. وفيه اغاني اتعملت ليه مخصوص.. يعني اسماعيل ياسين ليه فيلم اسمه اللص الشريف.. الفيلم مالوش علاقة لا بالثورة ولا باي نيلة.. بس الفيلم وهو بيتصور قامت الثورة… فحطوا مونولوج لبطل الفيلم بيعرف ان الثورة قامت.. فيغني اغنية بتقول .. عشرين مليون و زيادة كانوا عايشين هنا أموات..علشان حضرات السادة البهوات و الباشاوات.. وبيقول سمعة : “

كان فرجه قريب و سميع و مجيب

الجيش و نجيب عملوا الترتيب

وبفضل المولي عليه سعدنا تم علي ايديه

والشعب بقت له ارادة هدت كل الشنبات

وبقينا كلنا سادة و لا بهوات و لا باشاوات

 

فطبعا الاغنية دي اشك انك سمعتها لان الفيلم نفسه مكانش بيتعرض بسببها وظهر بعد كدا بعد بيع الافلام لاي ار تي..

 

لان حصل ازمة مارس سنة 1954.. وباختصار يعني نجيب كان معترض على حاجات بيعملوها الظباط الاحرار زي ان عبد الحكيم عامر يمسك وزير حربية لانه صغير واترقي رتب كتير قوي وهو خبرته العسكرية قليلة، بس على راي ابو زياد مش مهم..

 

في  في 22 فبراير 1954، قدم نجيب استقالته، وفي 25 فبراير اعلن مجلس قيادة الثورة إقالة محمد نجيب.. فالناس خرجت للشوارع.. وخرجت مظاهرات في السودان تهتف “لا وحدة بلا نجيب”.. بس مش دا الخطر .. الخطر الحقيقي ان الجيش كان فيه مؤيد لنجيب ومعارض لنجيب.. يعني سلاح الفرسان كله كان مع نجيب.. ودا خطر انقسام الجيش كان هيعمل كارثة.. فرجعوا نجيب.. وطلعوا بيان قالوا فيه :”حفاظا على وحدة الأمة يعلن مجلس قيادة الثورة عودة محمد نجيب رئيسا للجمهورية وقد وافق سيادته على ذلك”..

 

طيب هنا في مارس 1954.. حصلت ازمة الديمقراطية. المجلس انقسم نصين.. نص بيقول ان الجيش يرجع ثكناته ونعمل مجلس امة ونرجع الديمقراطية.. ونص يقول ديمقراطية مين.. البلد مش عايزة ديمقراطية دلوقتي..

 

فالشعب عمل اغرب مظاهرات في التاريخ، مظاهرات بتهتف بسقوط الديمقراطية.. ودا يوم 28 مارس 1954 .. طبعا معروف المظاهرات دي خرجت ازاي… متعرفش شوف كلام حسين الشافعي عن مظاهرات 54..

 

المهم يعني، فضل نجيب في الحكم لحد نوفمبر 1954.. وبعد كدا تم التحفظ على محمد نجيب تحت الاقامة الجبرية.. وقالوله انت هتقعد في فيلا زينب الوكيل لحد ما الامور تهدأ.. لكن الاقامة دي كملت 30 سنة مثلا..

 

وبعد كدا من سنة 1956 بقى عبد الناصر رئيس مصر، ومبقاش فيه مجلس قيادة ثورة.. فايهاب لما خلص جيش.. كان بح محمد نجيب اصلا..

 

فهو هيتعامل مع عبد الناصر اللي اصلا يعرفه من قبل ما يدخل الكلية الجوية، بيقول ان زكريا محيي الدين خده وهو طالب عرفه على عبد الناصر، وعبد الناصر كلمه عن الثورة وعن التحرر وعن الفساد، وطلب منه يوزع منشورات على الطلبة في جامعة فؤاد الاول  (جامعة القاهرة).. بتطالب بسقوط الملك.. (تقريبا انا قلت مرة زكريا ومرة خالد.. هما الاتنين كانوا احرار وكانوا ولاد عم.. ولما جمال عبد الناصر اتنحى بعد الثورة.. قالك انه ساب الحكم لزكريا محيي الدين.. فكانت المظاهرات بتهتف ارفض ارفض يا زكريا.. عبد الناصر مية المية)..

 

هنا كاتب المذكرات ايمن الصياد، بيسأل ايهاب سؤال مهم، وقاله هو فاروق كان سيء، فايهاب قاله:”هو كان انسان ظريف قوي، وبيحب الهزار والتنكيت، لكن مكانش خبير بامور السياسة عشان كان صغير (بالمناسبة جمال عبد الناصر اكبر من فاروق بسنتين)، وقال ان فاروق مكانش بيحكم وانما اللي كان بيحكم كانوا رؤساء الوزرات والاحزاب وبطانة فاسدة لكن فاروق لانه مش خبير مكتشفش الفساد دا، وقال ان فاروق كان بيعتبر نفسه مصري مش تركي، وانه كان بيحب مصر فعلا، وحتى الانجليز حاولوا يعزلوه وفشلوا، وقال انه قابل الملك فاروق بعد الثورة سنة 1954.. في مدينة سالزبورج.. وعرف ان الملك موجود هناك فراح يسلم عليه، وشرب معاه الشاي، ففاروق قاله: “طمني يا ايهاب مبسوطين”، قصده ع المصريين يعني، فايهاب قاله كنوع من المجاملة: “ايامك ما تتعوضش يا ملك”، ففاروق سكت ومعلقش، وبيقول ايهاب انه مذمش في عبد الناصر ولا في الثورة، لان اخلاقه اخلاق ملوك..

 

وعشان نختم موضوع فاروق، بيقول انه لما راح قابله في النمسا كان مع فاروق بنت ايطالية، لكن مكانتش حلوة، وانما طاطا زكي بتاعت المعادي احلى منها 100 مرة، وانا من منبري هذا اللي هو سرير احمد ابني.. هموت واعرف مين هي طاطا زكي.. نفسي في راجل ابن راجل يقولي مين هي طاطا زكي..

 

المهم يعني مات فاروق، وحزن عليه ايهاب جدا، عشان نقفل على كراسة الملك فاروق وتيت تيت خلص الشريط، نشطب ع المنطقة دي من دماغنا وعلم يا معلم حبشي عليهم.. ويا عروسة اخوكي زينهم بيقولك بالراحة..

 

المهم يعني، ايهاب بيقول ان ثورة يوليو ثورة كويسة، وهي كان هدفها انهاء السلبيات.. اه عملت سلبيات اكتر، بي يعني ما المؤمن منصاب.. وقال ان عبد الناصر كان مفتون بفكرة الوحدة، وبعد الوحدة مع سوريا فكر في الوحدة مع الاردن ولبنان.. ومش عارف ازاي فكر في الوحدة مع الاردن وهو كان بيشتم ملك الاردن كل تلات وخميس.. بس عموما يعني هو بعد ما فشلت الوحدة مع سوريا اكتشف ان “الوحدة” صعبة..

 

بيحكي ايهاب برضه، انه قابل الرئيس الجزائري احمد بن بيلا (مكتوبة كدا في المذكرات).. لكن هو اسمه أحمد بن بلة.. ودا طبعا غير عمرو بيلا.. احمد بن بيلا اول رئيس للجزائر.. وقابل ايهاب في فندق شيراتون سنة 2001.. وقاله: “لولا مساعدة مصر لثوار الجزاير مكانتش اتحررت”.. على جنب يعني.. احمد بن بلة.. مسك الحكم.. وحصل عليه انقلاب من هواري بو مدين وبقى هو رئيس الجزائر..

 

وقال انه اتعرف على الرئيس الجزائري بن بلة.. لما كان بيسلم السلاح للفدائيين في سنة 1958.. لانه كان طيار من الطيارين المكلفين بدا.. وسلام بن بلة 8 طيارات محملة بالسلاح..

 

ايهاب بقى بيحكي انه شاف اللواء محمد نجيب مرة واحدة في حياته، لان اللواء نجيب كان خال ظابط في الكلية مع ايهاب اسمه حسن سالم، فحسن صاحب ايهاب عزم ايهاب على الغدا في بيت خاله، فراح لقى خاله محمد نجيب، مش بقولك بيمشي بيتكعبل في رؤساء..  وقال ان نجيب كان راجل متواضع ومرح وشديد الطيبة.. والله ما حد مرح وشديد الطيبة الا انت يا اخي..

 

لكن ايهاب بيحكي قصة مغايرة خالص عن اللي حصل في تأميم قناة السويس.. لانه كان طيار الريس.. فهو يعني سمع كلام من هنا كلام من هناك.. بس هيقول.. هنضغط عليه ونخليه يقول.. بس دا بكرا إن شاء الله..

 

الجزء السادسايهاب نافع – المخابراتي الوسيم 6

 

 وقفنا امبارح عند تأميم قناة السويس، واللي ايهاب نافع بيحكي انه شارك في عملية التأميم.. طيب ازاي..

 

قالك يا سيدي ايهاب نافع كان من قوات الجيش اللي مستنية كلمة السر اللي هيقولها عبد الناصر عشان يتحركوا وكلمة السر كانت ديلسيبس.. ساعتها عبد الناصر كرر الكلمة 16 مرة..

 

 وفعلا اتحركت القوات، يهمني منهم دلوقتي ايهاب نافع، اللي بيحكي انه  كان في الاسماعيلية ومعاه مجموعة من الشرطة العسكرية، وكان دوره يأمن دخول إحدى المجموعات لدخول مينى هيئة قناة السويس.. وعمل الدور دا فعلا..

 

وبيحكي انه بعد تدمير ممر 36 في مطار الماظة، وكان فيه مبنى القيادة والمستشفى العسكري، كان لازم يلاقوا مكان ينفع مقر للقيادة وكمان يلاقوا مستشفى لعلاج المصابين، فخرج بالعربية بتاعته وقعد يلف، فاختار فندق متروبولتن هوتيل”، عشان يبقى مقر القيادة.. لانه كان وسط المباني فصعب يتضرب، والمهمة التانية كانت انه يلاقى مستشفى، فخرج لقى ممرضات في الشارع سالهم شغالين فين يا بنات.. قالوله مش الك دعوى.. المهم بعد ضغط عرف منهم انهم شغالين في المستشفى الفرنساوي.. فراح للفريق صدقي.. قائد القوات الجوية.. وقاله  يا فندم لقيت مستشفى تنفع للغرض اللي احنا عايزينه.. وبما اننا في حالة حرب مع فرنسا يبقى من حقنا نحتل مستشفياتهم.. فقاله نفذ فورا..  فاحتل المستشفى بالشرطة العسكرية..

 

ودخلوا للفريق الطبي، وقالولهم ان رواتبكم شغالة وكله تمام.. بس من اللحظة دي احنا هنعالج المصريين بس مش الفرنسيين مش الطليان.. ومش الفنان محمد رمضان.. باعتباره بطل الالماني.. وحشة.. انا عارف انها وحشة متزقش يا سيدي.. وبيقول ايهاب نافع من الوقت دا بقت المستشفى الفرنساوي جزء من الكيان الطبي المصري.. دخلناه ولم نخرج منه.. الله يا بلادنا الله.. مليون مبروك لمصر.. بس مينفعش يبقى اسمه المستشفى الفرنساوي.. فسموه المستشف الحوي…

 

ايهاب نافع شايف ان حرب 56 كانت حرب وجود.. تو بي اور نوت تو بي.. واحنا انتصرنا فيها عسكريا وسياسيا.. بص هو احنا منتصرناش عسكريا.. بس انتصرنا سياسيا.. بس دا مش موضوعنا يعني..

 

نيجي للسؤال المهم، انت مسمي الراجل المخابراتي الوسيم، وسيم وعرفناها.. فين المخابراتي في الموضوع دا راجل عسكري بيعمل شغله عادي، مفيش اي شغل مخابراتي في الموضوع..

 

انت عندك حق، لان شغله مع المخابرات هيبدأ مع سنة 1956.. لما كشف شبكة جاسوسية شغالة في العريش الله ينور، وبتجسس علينا وبتبعت الكلام للناس التانيين (عشان مارك بيزعل).. والحقيقة انه اكتشافه للشبكة كان محض صدفة يعني.. والقصة انه كان قاعد في استراحة الظابط في مطار العريش.. وكان ماسك نظارة مكبرة.. بيبص على الجبال والاشجار بيسلي وقته يعني.. فلقى طفل عنده عشر سنين قاعدة على تبة صغيرة..

 

طيب ما عادي يا سيدي.. طفل مصري جميل قاعد على تبة مصرية جميلة.. قالك ما هو مش جميل.. لانه كان ماسك شوية حصا.. (زلط صغير).. وكل ما تعدي عربية تخش القوات الجوية.. كان يزود الحصا واحدة.. فضل مراقبة فترة.. لقاه بيعمل كدا بانتظام.. ايه دا طفل مصري مش جميل بيعد العربيات المصرية الجوية الجميلة..

 

بص ع الحصوات لقاع مقسمهم نصين.. النص الاول 24 واحدة والنص التاني 18 واحدة.. فاتصل ايهاب ع الشرطة العسكرية باللاسلكي، وقالهم ادوني بيان بالعربيات اللي دخلت وخرجت.. فلقاهم نفس الاعداد اللي عاملها الولد.. اوه نو.. اذا انت سباي.. هاتوه..

 

شغال مع مين ياض.. قاله مش شغال.. راح ضاربه.. الواد متكلمش.. راح واخده ومسلمه للمخابرات.. فطلع شغال مع راجل من عرب سينا.. واتقبض ع الراجل فعلا.. واكتشفوا انه شغال مع المو***ساد.. بدري قوي كدا دا احنا 56.. دا الجهاز متأسس من 7 سنين.. دا انت من الاباء المؤسسين يا جدع..

 

من ساعتها بدأت قصة ايهاب نافع مع المخابرات.. ولقوه حاجة حلوة.. ظابط غني.. وسيم..وبيتكلم كذا لغة.. وممكن يستفادوا منه في حاجات كتير..

 

وهنا بيحكي ايهاب عن قصة رفعت الجمال وعلاقته بيه،ازاي بدأت وازاي بقى اقرب صاحب ليه، وازاي اتجوز ارملته بعد ما مات..

 

فنمشي واحدة واحدة.. بقول ان علاقته برفعت الجمال  (رأفت الهجان) بدأت قبل النكسة وكان بيستلم منه معلومات ويسلمها للقيادة، وقال نصا ان رفعت الجمال بلغ مصر بالهجوم الاسرا********ئيلي في 5 يونيو لكن مصر مهتمتش..

 

وبيقول من المعلومات اللي هو استلمها بنفسه من الهجان وسلمها للقيادة، كانت التخطيط الهندسي لحرب بارليف.. ودا ساعد اننا جبناه ارض ارض.. وكمان خطة حرب يونيو 1967.. لكن مصر مهتمتش قوي في الاولى.. وفكرت ان الموضوع يعني رزع في الهوا.. فاتزرعنا احنا بقى..

 

حتى ان ايمن الصياد بيسأله.. هل قدمت معلومات دقيقة عن حرب 1967… فقاله : “والله بالمللي والتاريخ والساعة وطريقة الهجوم”، فانت زارع جاسوس.. جابلك معلومة.. وانت مستخدمتهاش.. طيب بتزرع ليه من الاول.. ما كنت خليك في الصناعة..

 

طيب واتقابل تاني مع الهجان، قاله اه اتقابل معاه لما جه لمصر سرا سنة 1975.. والسادات اداله حق التنقيب عن البترول والغاز في الصحراء الغربية مقابل 150 الف دولار بس بدل من مليون دولار (وخد بالك من النقطة دي عشان هتعمل قلق بعدين)… اوعى تعمل زي الحكومة ومتهتمش.. وساعتها رفعت صفى كل اعماله في اسرا***ئيل وراح عاش في المانيا..

 

طيب ازاي اتجوز ارملة الهجان، وايه هي وصية الهجان، وازاي عرف ماجدة.. كل دا بكرا إن شاء الله..

 

يومكم حلو وجميل يا حلوين.. وكل سن واحنا طيبين وبخير وسعادة ومحبة..

 

الجزء السابع

https://www.facebook.com/photo/?fbid=1156143859211271&set=a.203536444472022

الجزء التامن

ايهاب اتقبض عليه – المخابراتي الوسيم 8

 

ايهاب نافع سافر لأفريقيا في مهمة وطنية، هي تقليل النفوذ الاسر** ائيلي في افريقيا وانه يمنع وصول البضاعة بتاعتهم لهناك.. كخطوة استباقية يعني.. وسنة 1960 استقال من الشغل في الجيش خالص… طيب ليه.. دا راجل يعني بيحب الطيران.. هو بيقول إنه قضى 9 سنين وعشر شهور في الجيش.. فهو زهق من الموضوع.. ومل من الحياة العسكرية، وكمان طار 800 ساعة..

 

لكن سنة 1965.. وبعد ما اشتغل في الفن، كان بيصور فيلم مع فاتن حمامة، اسمه شيء في حياتي، والفيلم مقتبس عن الفيلم البريطاني “Brief Encounter” أو “لقاء قصير”، والفيلم قريب من فيلم نهر الحب..

 

المهم يعني، ايهاب نافع كان بيقول في الوقت دا أن سبب تاخرنا هم الروس.. ولو اتجهنا بالتسليح ناحية امريكا حالنا هيتعدل، لان السلاح الامريكي متطور جدا.. الكلمتين دول قالهم وهو بيصور.. وفجأة لقى البوليس الحربي بيقبض عليه.. حد وصل الكلمتين للمشير عامر، فصدر قرار بالقبض عليه، بيقول أن القبض عليه استمر ليومين بس.. وان في الوقت دا كانت شتيمة الروس جريمة… لانها حليف قوي لمصر..

بيحكي إنه خد يومين، محدش اتعرضله ولا شاف أي نوع من التنكيل، وان لو كان الريس عبد الناصر أو زكريا محيي الدي موجودين في مصلار، مكانش حصلي كدا… كانوا الاتنين مسافرين.. واول ما رجعوا افرجوا عنه..

 

المهم يعني، هو طلع من السجن، وقرر يسافر للبنان كلاجئ سياسي، ودي معلومة انا اول مرة اعرفها، سافر فعلا لبنان كلاجئ سياسي واتقبل لجوءه، ودي برضه معلومة غريبة عليا لان علاقة عبد الناصر بلبنان كانت كويسة جدا، بس في السياسة كل شيء مباح يعني، المهم في لبنان شقة وطباخ وسفرجي، وكان يقيم هناك بشكل دائم، ومسابش البلد غير لما راج استراليا.. ومرجعش مصر غير لما مات عبد الناصر (عبد الناصر مات سنة 1970)، وهو رجع سنة 1971..

 

هو كمان اشتغل افلام في فترة وجوده في لبنان، والحقيقة الفترة دي الإنتاج فيها كله كان تعبان، اما اعادة لافلام قديمة، أو افلام رديئة بتركز ع الجنس والغرائز، ودا بيظهر دايما عند الامم المهزومة..

 

خليني بس قبل ما نروح لحتة التمثيل، احكيلك انه بعد ما ساب الطيران، قدم في مصر للطيران، عشان يشتغل طيار مدني يعني، والحقيقة هو كان عينه انه يطير بطيارة اسمها اكومت، وبيقول ان دي كانت احسن طيارة في الوقت دا، وكانت بـ 4 محركات نفاثة، المهم يعني، كبير الطيارين كان اسمه كابتن شمس، كابتن شمس، راح حط ايهاب على طيارة فاوي كاونت، ويبدو انها مكانتش الطيارة اللي يحب يسوقها فاستقال وسافر انجلترا، اشتغل في مؤسسة تابعة للسير انتوني ناتنج..

 

الراجل انتوني ناتنج كان دبلوماسي وسياسي انجليزي معروف، يعني هو اللي قاد المفاوضات مع مصر، وانتهت بجلاء القوات الانجليزية، وكان معجب بعبد الناصر واستقال من الوزارة احتجاجا على العدوان الثلاثي على مصر، والف كتاب عن عبد الناصر.. والكتاب مفيهوش شبهة تملق، لانه صدر اصلا بعد وفاة عبد الناصر بسنتين..

 

وفضل في انجلترا لحد سنة 1962.. لما عرف أن امه تعبان جدا، فنزل مصر، واتطمن على امه، وساعتها عبد الناصر خيره بين إنه يرجع للجيش تاني يطير تبع السرب الرئاسي، ولا يشتغل مع كمال رفعت.

 

نائب الرئيس، فاختار ايهاب انه يشتغل مع كمال رفعت، ومعرفش ليه.. هو مبيقولش وانا معنديش تفسير..

 

طيب ايه طبيعة شغله مع كمال رفعت، زي ما قلتلك، هو كان دوره يقلل من النفوذ الاسر** ائ )) يلي في افريقيا.. ويعمل علاقات دبلوماسية واقتصادية وتجارية مع الدول الافريقية.. وكان ايهاب موكل بـ 3 دول، الكونغو، والكونغوكينشاسا (زائير – الكونغو الديمقراطية) وتشاد.. وكان شغال تحت منه 11 ظابط..

 

 

وهنا كاتب المذكرات، سال ايهاب سؤال مهم قوي، وقاله ايه علاقة عبد الناصر بدول افريقيا، قاله بص هو مكانش عايز اسر  ائيل تتاجر مع الدول الافريقية عشان اقتصادها ميقواش، قاله طيب والدول الافريقية دي كانت بتتعاون معاكم.. قاله ولا تعرف اننا كنا موجودين اصلا.. هما كانوا بيعملوا مناقصات لحاجات هما عايزينها.. فاسرا  ئيل تدخل المناقصة واحنا ندخل.. وكنا بناخدها بسعر الخسار عشان نمنعهم يعملوا حاجة.. وكنا بنبيعلهم الحاجة باقل من سعر التكلفة اصلا.. المهم اسر     ،، ائيل متشتغلش..

ايهاب اصلا كان في لبنان لما حصلت النكسة، وقال أن النكسة يتحملها المشير عامر بصفته قائد الجيش وعبد الناصر بصفته القائد السياسي للبلد، وقال أن رأفت الهجان جاب ساعة الصفر بتاعت النكسة، وقال أن اسر ائيل هتضرب مصر يوم 5 يونيو سنة 1967 الساعة 8 صباحا.. واكد المعلومة دي 6 عملاء زراعهم مصر هناك.. فانت عندك معلومة زي دي وما استغلتهاش ازاي…

 

طيب ايه اللي حصل؟

 

بيحكي ايهاب، إنه الرئيس اتصل بالسفير الروسي والامريكي، فاكدله السفير الامريكي أن اسرائيل مش هتضرب، فصدقهم، وعمل اجتماع مع قادة الدفاع في 28 مايو 1967… يعني قبل الحرب باسبوع، وحط قدامهم موضوع ساعة الصفر الاسر  ** ائيلية .. وقالهم اني كلمت الامريكان وقالولي اسر))) ائيل مش هتضرب.. بس اوعى تضرب انت واسرا*** ئيل ترد عليك.

 

ساعتها الفريق صدقي، قائد القوات الجوية، قاله يا ريس انا جاهز اضرب بكرا، وهيكون النصر حليفنا بنسبة 75%،  فقاله لا يا صدقي انا وعدت السفير الامريكي والروسي اني مش هبدأ بالضرب..

 

فالفريق صدقي قاله يا ريس لو هما اللي بدوا بالضرب احنا هنزعل.. فقاله هتخسر كام من قواتك 25% يعني.. فقاله لا 99%..  لاننا معندناش دوشم كفاية.. وكنت بطلب من حضرتك دوشم تقولي مفيش فلوس، ساعتها عبد الناصر، قاله: “طيب يا صدقي، قوم دلوقتي وروح اعمل دوشم”..

 

بما يعني روح روح.. (اقيل الفريق صدقي في 11 يونيو سنة 1967)..

 

وبيقول إن اسر*** ائيل ضربت بعد الموعد اللي حدده رأفت الهجان بـ 3 دقايق بس.. وساعتها حصلت النكسة، وسقطت مصر في 6 ايام.. بالمناسبة السادات في خطاب النصر كان بيتك على كلمة 6 ساعات.. عشان يعني انتوا هزمتونا في 6 ايام فاحنا هزمناكم في 6 ساعات..

 

المهم يعني، ايهاب بيحمل مسئولية النكسة لعبد الناصر، وقال أن المشير عامر مسئول طبعا زيه زي عبد الناصر بصفته قائد الجيش، ولما ايمن الصياد قاله بس عبد الناصر تحمل المسئولية بدليل إنه تنحى.. فايهاب قاله : “لا تعليق”..

 

وبيحكي ايهاب نافع عن ازاي تلقى خبر وفاة عبد الناصر.. ودخول الحياة مرحلة جديدة خالص معاه.. بس دا بكرا بقى.. 

 

#بهاء_حجازي

 

 

الجزء التاسع

ايهاب نافع – المخابراتي الوسيم 9

 

وقفنا امبارح عند ازاي ايهاب نافع استقبل خبر وفاة عبد الناصر، وقلتلك انه كان في لبنان اصلا وقتها.. لأنه كان عامل لجوء سياسي من سنة 1965.. حلو حلو…

 

بيحكي ايهاب إنه اثناء النكسة كان بيطير بطيارة من نوع “سسنا 310)، تابعة لشركة كراولي إيريزو غينيا الجديدة، كان بدأ الشغل فيها سنة 1970، واثناء الاتصال ببرج المراقبة، فقاله البرج : “كابتن ايهاب، رئيسك مات”…

فقاله أي رئيس اللي مات، فقاله ناصر، فايهاب سأله هل مات في حادث، فالراجل في البرج قاله: “لا أعلم”، بيقول إنه حزن جدا لوفاته لكن مبكاش خالص.. مبكاش غير لما شاف جنازته في التلفزيون بعد 3 أيام.. وكان النعش محمول بيلف في الشوارع، بيقول: “رغم كل شيء، كنت أحبه، لقد عشت معه أيام جميلة”..

 

خليني هنا اطلع برا الموضوع شوية، أحمد فؤاد نجم اتسجن في عهد عبد الناصر وهجاه كتير، فلما مات، راحتله امه زيارة في السجن وبكت، وقالتله ابو المصريين مات، قالها انتي يا ولية بتبكي ع اللي سجن ابنك.. فقالتله احنا يتامى يا ابني.. فكتب أحمد فؤاد نجم.. قصيدة عن عبد الناصر اسمها زيارة إلى ضريح عبد الناصر  بتقول:

عمل حاجات معجزة وحاجات كتير خابت

وعاش ومات وسطنا

على طبعنا ثابت

وان كان جرح قلبنا كل الجراح طابت

ولا يطولوه العدا

مهما الأمور

جابت

 

المهم، نرجع لايهاب نافع، اللي هيرجع مصر من تاني، خصوصا أن نظام السادات مختلف عن نظام ناصر، وهو فتح تقريبا صفحة جديدة مع كل أخصام عبد الناصر، وعمل أخصام جديدة، وهي دي السياسة، السياسة لا فيها خصومة دايمة ولا محبة دايمة،

 

اول علاقة ايهاب نافع بالسادات بدأت سنة 1951، قبل ثورة يوليو بسنة، ساعتها جه السادات للمعادي، وكون فرقة من الفدائيين، وإيهاب كان واحد منهم، ودربهم السادات على صنع القنابل المول- وتوف..  وازاي يستخدموها ضد الانج** ليز.. وان علمهم يستخبوا فوق الشجر، واول ما العربية تعدي يطرشموها في وشهم..

 

 وهنا اتسأل ايهاب نافع ازاي السادات وصل انه يبقى نائب رئيس الجمهورية ثم رئيس الجمهورية، والحقيقة ايهاب بيفسر الموضوع تفسير منطقي، انا نفسي مقتنع بيه، السادات كان بيلعب دور الشخص اللي مالوش أي اطماع سياسية.. وكان بيوافق عبد الناصر على أي حاجة يقولها… واي معركة داخلية بين مجلس قيادة الثورة، كان بيعمل نفسه تعبان، ويلبس الروب، ويتصل بجمال يوصيه على مراته وعياله، فهو عاش دور الشخص اللي مفيش خطر منه، وانه مالوش أي اطماع في السلطة..

 

هنا برضه ايهاب، بيقول أن السادات كان زكي، وضحك ع اليهود وخد منهم سينا بورقة كامب ديفيد، والحقيقة دا كلام عبيط قوي، انت راجل انتصرت في الحرب، وقعدت ع طاولة المفاوضات، وانت اللي سعيت للسلام، استفدت انت ايه من السلام.. خدت ارضك.. اللي هي اصلا ارضك.. في المقابل.. اديتهم اعتراف بوجودهم مع اكبر دولة في المنطقة، امنتلهم اهم حدود عندهم، هو واثق إنه مش هيجيله من ناحيتها أي خطر، طوال فترة السادات ومبارك، سينا كانت خرابة، وفقا للاتفاقية، ومحدش كان بيقرب منها، ولا بنينا فيها ولا عمرنا، يعني بكل المقاييس هو اللي مستفيد.. فانا مش عارف اللي بيروج لدا بيروج لدا ازاي.. غير كدا انت خاصمت كل العرب.. شقيت الصف مع العرب.. وفضلت في عزلة ومقاطعة من كل الدول العربية.. وفقدت دورك الاقليمي… بس ما علينا..

 

الفكرة أن ايهاب بيقوله أن الاتفاقية خلتنا نتفرغ لعملية البناء والتنمية الاقتصادية، فاحنا وضعنا الاقتصادي دا.. بعد ما اتفرغنا.. طيب يا اخويا يا ريتنا ما اتفرغنا.. هو فين البناء الاقتصادي دا.. دا المصانع كلها قفلت.. واللي خارج من البلد اكتر من الداخل.. هو يا جماعة انتوا دارسين بناء اقتصادي في جامعة ايه..

 

ايهاب من أكثر المدافعين عن المعاهدة، وشايف اننا معرفناش ناخد منهم أي حاجة بالحرب، طبعا لانهم اقوى مننا، فـ الحل نلعب معاهم سياسة، وبيحكي عن دوره في عملية كامب ديفيد..  إنه نقل للسادات معلومات مهمة من امريكا، استعان بيها الرئيس وهو بيوقع الاتفاقية، وانه  لما جاب المعلومات، قابلوه عناصر من رئاسة الجمهورية، قالوله شاطر يا ايهاب هات الورق نوصله للريس، قالهم معلش اشوفه بنفسي..

 

فودوه فندق هيلتون، وقالوله نام، وبكرا هنيجي ناخدك، وفعلا جه ظباط ونقلوه من هيلتون لقصر عابدين، فجأة جابوله طيارة، وقالوله اركب، على فين، قالوله هنوديك تقابل الريس، وخدوه لاستراحة كان بيقعد فيها الريس قرب بحيرة التمساح، وسلمه الظرف، فساله السادات: “قريته”.. فقاله نعم، قاله طيب اقعد، قعد السادات يقرا الورق، وبعد ما خلص، قاله ها يا ايهاب.. هتكون فين الفترة اللي هكون فيها انا في امريكا.. فايهاب قاله انا اصلا شغال في امريكا.. قاله كويس.. خليك جنبنا بس.. عشان لو عوزناك نلاقيك.. الغريب أن السادات قالهاله بالانجليزي..

 

فايهاب قاله : “بكل ممنونية يا ريس”… حسن اسماعيل فرد من افراد الحراسة يعرف مكاني ومعاه رقمي في امريكا… ولما كاتب المذكرات، سأل إيهاب، ممكن اعرف ايه اللي كان مكتوب في الاوراق دي، فقاله لا دا سر مقدرش اقول عليه..

 

لكن دي مش المقابلة الأولى لايهاب مع السادات لما بقى رئيس، لان ايهاب راحله هو وظابط من الظباط الاحرار اسمه محمد عثمان، وقابلوه عشان يسمحلهم بالرجوع لمصر والجيش، فقالهم: “مصر بلدكم، ومن اراد أن يعود إلى عمله.. فأهلا بيه.. ولن نخصم الفترة الزمنية التي انقطعتم فيها”.. فمحمد عثمان رجع الجيش ومات بعد شهرين وعشان دماغك متروحش لبعيد… فإيهاب بيأكد أن الوفاة طيعية، وإيهاب فضل إنه يرجع مصر يعيش فيها.. لكنه مش عايز يرجع الجيش.. عايز يكمل شغل في السينما..

 

هنا بتحصل نطة كبيرة قوي، وبيسأله أيمن الصياد كاتب المذكرات، وازاي تلقيت خبر اغتي‘‘ ال الرئيس السادات، فقال ايهاب إنه كان ساكن  في فندق في نيو يورك.. وكانت الساعة عندهم 5 الصبح (ع جنب كدا فيه فرق توقيت بينا وبين امريكا 7 ساعات كاملين).. وقال إنه كان بيتابع الاحتفالات عادي.. لكن فجأة انقطع البث وعرفنا إنه تم اغتياله.. وقال : “حزنت كثيرا عندما تم اغتياله، لانني كنت احبه رحمه الله”..

 

وهنا سأله سؤال مهم، انت شفت عصر عبد الناصر وعصر السادات، شايف ايه الفرق بين الاتنين.. ايهاب بيقول جملة انا دايما بسمعها، بس مسمعتهاش من السادات نفسه، ايهاب بيقول: “أن السادات قال اللي مغتناش في عهدي مش هيغتني ابدا، ومصر شهدا انفتاح عظيم في عهده، وفرص كبيرة للثراء عكس الرئيس عبد الناصر”.

 

 وهنا برضه سأله عن فكرة أن الناس بتهاجم السادات بسبب كامب ديفيد، فقاله: “اللي يقول أن العلاقة بينا وبين اسرا*** ئيل مش صحيحة يبقى ميفهمش سياسة… واللي عايزش سلام بينا وبينهم، عايز مصر تفضل علطول تدفع فواتير اخطائهم من اموالها واولادها”..

 

وهنا هيبدأ ايهاب يحكي عن علاقته بحافظ الأسد الرئيس السوري الراحل ووالد الرئيس السوري السابق بشار الاسد، وازاي قابل اسامة بن لادن، وازاي جاوب على السؤال اللي سألهوله الشيح زايد آل نهيان.. لكن دا بكرا إن شاء الله..

 

#بهاء_حجازي

 

الجزء 10

ايهاب نافع – المخابراتي الوسيم 9

 

وقفنا امبارح عند ازاي ايهاب نافع استقبل خبر وفاة عبد الناصر، وقلتلك انه كان في لبنان اصلا وقتها.. لأنه كان عامل لجوء سياسي من سنة 1965.. حلو حلو…

 

بيحكي ايهاب إنه اثناء النكسة كان بيطير بطيارة من نوع “سسنا 310)، تابعة لشركة كراولي إيريزو غينيا الجديدة، كان بدأ الشغل فيها سنة 1970، واثناء الاتصال ببرج المراقبة، فقاله البرج : “كابتن ايهاب، رئيسك مات”…

فقاله أي رئيس اللي مات، فقاله ناصر، فايهاب سأله هل مات في حادث، فالراجل في البرج قاله: “لا أعلم”، بيقول إنه حزن جدا لوفاته لكن مبكاش خالص.. مبكاش غير لما شاف جنازته في التلفزيون بعد 3 أيام.. وكان النعش محمول بيلف في الشوارع، بيقول: “رغم كل شيء، كنت أحبه، لقد عشت معه أيام جميلة”..

 

خليني هنا اطلع برا الموضوع شوية، أحمد فؤاد نجم اتسجن في عهد عبد الناصر وهجاه كتير، فلما مات، راحتله امه زيارة في السجن وبكت، وقالتله ابو المصريين مات، قالها انتي يا ولية بتبكي ع اللي سجن ابنك.. فقالتله احنا يتامى يا ابني.. فكتب أحمد فؤاد نجم.. قصيدة عن عبد الناصر اسمها زيارة إلى ضريح عبد الناصر  بتقول:

عمل حاجات معجزة وحاجات كتير خابت

وعاش ومات وسطنا

على طبعنا ثابت

وان كان جرح قلبنا كل الجراح طابت

ولا يطولوه العدا

مهما الأمور

جابت

 

المهم، نرجع لايهاب نافع، اللي هيرجع مصر من تاني، خصوصا أن نظام السادات مختلف عن نظام ناصر، وهو فتح تقريبا صفحة جديدة مع كل أخصام عبد الناصر، وعمل أخصام جديدة، وهي دي السياسة، السياسة لا فيها خصومة دايمة ولا محبة دايمة،

 

اول علاقة ايهاب نافع بالسادات بدأت سنة 1951، قبل ثورة يوليو بسنة، ساعتها جه السادات للمعادي، وكون فرقة من الفدائيين، وإيهاب كان واحد منهم، ودربهم السادات على صنع القنابل المول- وتوف..  وازاي يستخدموها ضد الانج** ليز.. وان علمهم يستخبوا فوق الشجر، واول ما العربية تعدي يطرشموها في وشهم..

 

 وهنا اتسأل ايهاب نافع ازاي السادات وصل انه يبقى نائب رئيس الجمهورية ثم رئيس الجمهورية، والحقيقة ايهاب بيفسر الموضوع تفسير منطقي، انا نفسي مقتنع بيه، السادات كان بيلعب دور الشخص اللي مالوش أي اطماع سياسية.. وكان بيوافق عبد الناصر على أي حاجة يقولها… واي معركة داخلية بين مجلس قيادة الثورة، كان بيعمل نفسه تعبان، ويلبس الروب، ويتصل بجمال يوصيه على مراته وعياله، فهو عاش دور الشخص اللي مفيش خطر منه، وانه مالوش أي اطماع في السلطة..

 

هنا برضه ايهاب، بيقول أن السادات كان زكي، وضحك ع اليهود وخد منهم سينا بورقة كامب ديفيد، والحقيقة دا كلام عبيط قوي، انت راجل انتصرت في الحرب، وقعدت ع طاولة المفاوضات، وانت اللي سعيت للسلام، استفدت انت ايه من السلام.. خدت ارضك.. اللي هي اصلا ارضك.. في المقابل.. اديتهم اعتراف بوجودهم مع اكبر دولة في المنطقة، امنتلهم اهم حدود عندهم، هو واثق إنه مش هيجيله من ناحيتها أي خطر، طوال فترة السادات ومبارك، سينا كانت خرابة، وفقا للاتفاقية، ومحدش كان بيقرب منها، ولا بنينا فيها ولا عمرنا، يعني بكل المقاييس هو اللي مستفيد.. فانا مش عارف اللي بيروج لدا بيروج لدا ازاي.. غير كدا انت خاصمت كل العرب.. شقيت الصف مع العرب.. وفضلت في عزلة ومقاطعة من كل الدول العربية.. وفقدت دورك الاقليمي… بس ما علينا..

 

الفكرة أن ايهاب بيقوله أن الاتفاقية خلتنا نتفرغ لعملية البناء والتنمية الاقتصادية، فاحنا وضعنا الاقتصادي دا.. بعد ما اتفرغنا.. طيب يا اخويا يا ريتنا ما اتفرغنا.. هو فين البناء الاقتصادي دا.. دا المصانع كلها قفلت.. واللي خارج من البلد اكتر من الداخل.. هو يا جماعة انتوا دارسين بناء اقتصادي في جامعة ايه..

 

ايهاب من أكثر المدافعين عن المعاهدة، وشايف اننا معرفناش ناخد منهم أي حاجة بالحرب، طبعا لانهم اقوى مننا، فـ الحل نلعب معاهم سياسة، وبيحكي عن دوره في عملية كامب ديفيد..  إنه نقل للسادات معلومات مهمة من امريكا، استعان بيها الرئيس وهو بيوقع الاتفاقية، وانه  لما جاب المعلومات، قابلوه عناصر من رئاسة الجمهورية، قالوله شاطر يا ايهاب هات الورق نوصله للريس، قالهم معلش اشوفه بنفسي..

 

فودوه فندق هيلتون، وقالوله نام، وبكرا هنيجي ناخدك، وفعلا جه ظباط ونقلوه من هيلتون لقصر عابدين، فجأة جابوله طيارة، وقالوله اركب، على فين، قالوله هنوديك تقابل الريس، وخدوه لاستراحة كان بيقعد فيها الريس قرب بحيرة التمساح، وسلمه الظرف، فساله السادات: “قريته”.. فقاله نعم، قاله طيب اقعد، قعد السادات يقرا الورق، وبعد ما خلص، قاله ها يا ايهاب.. هتكون فين الفترة اللي هكون فيها انا في امريكا.. فايهاب قاله انا اصلا شغال في امريكا.. قاله كويس.. خليك جنبنا بس.. عشان لو عوزناك نلاقيك.. الغريب أن السادات قالهاله بالانجليزي..

 

فايهاب قاله : “بكل ممنونية يا ريس”… حسن اسماعيل فرد من افراد الحراسة يعرف مكاني ومعاه رقمي في امريكا… ولما كاتب المذكرات، سأل إيهاب، ممكن اعرف ايه اللي كان مكتوب في الاوراق دي، فقاله لا دا سر مقدرش اقول عليه..

 

لكن دي مش المقابلة الأولى لايهاب مع السادات لما بقى رئيس، لان ايهاب راحله هو وظابط من الظباط الاحرار اسمه محمد عثمان، وقابلوه عشان يسمحلهم بالرجوع لمصر والجيش، فقالهم: “مصر بلدكم، ومن اراد أن يعود إلى عمله.. فأهلا بيه.. ولن نخصم الفترة الزمنية التي انقطعتم فيها”.. فمحمد عثمان رجع الجيش ومات بعد شهرين وعشان دماغك متروحش لبعيد… فإيهاب بيأكد أن الوفاة طيعية، وإيهاب فضل إنه يرجع مصر يعيش فيها.. لكنه مش عايز يرجع الجيش.. عايز يكمل شغل في السينما..

 

هنا بتحصل نطة كبيرة قوي، وبيسأله أيمن الصياد كاتب المذكرات، وازاي تلقيت خبر اغتي‘‘ ال الرئيس السادات، فقال ايهاب إنه كان ساكن  في فندق في نيو يورك.. وكانت الساعة عندهم 5 الصبح (ع جنب كدا فيه فرق توقيت بينا وبين امريكا 7 ساعات كاملين).. وقال إنه كان بيتابع الاحتفالات عادي.. لكن فجأة انقطع البث وعرفنا إنه تم اغتياله.. وقال : “حزنت كثيرا عندما تم اغتياله، لانني كنت احبه رحمه الله”..

 

وهنا سأله سؤال مهم، انت شفت عصر عبد الناصر وعصر السادات، شايف ايه الفرق بين الاتنين.. ايهاب بيقول جملة انا دايما بسمعها، بس مسمعتهاش من السادات نفسه، ايهاب بيقول: “أن السادات قال اللي مغتناش في عهدي مش هيغتني ابدا، ومصر شهدا انفتاح عظيم في عهده، وفرص كبيرة للثراء عكس الرئيس عبد الناصر”.

 

 وهنا برضه سأله عن فكرة أن الناس بتهاجم السادات بسبب كامب ديفيد، فقاله: “اللي يقول أن العلاقة بينا وبين اسرا*** ئيل مش صحيحة يبقى ميفهمش سياسة… واللي عايزش سلام بينا وبينهم، عايز مصر تفضل علطول تدفع فواتير اخطائهم من اموالها واولادها”..

 

وهنا هيبدأ ايهاب يحكي عن علاقته بحافظ الأسد الرئيس السوري الراحل ووالد الرئيس السوري السابق بشار الاسد، وازاي قابل اسامة بن لادن، وازاي جاوب على السؤال اللي سألهوله الشيح زايد آل نهيان.. لكن دا بكرا إن شاء الله..

 

#بهاء_حجازي

 

 

الجزء 11

ايهاب نافع – المخابراتي الوسيم 11

 

وقفنا المرة اللي فاتت لما الكاتب ايمن الصياد، كاتب المذكرات، سأل إيهاب: “مقابلتش اس’’’ امة بــ ن ladn  فايهاب قاله قابلته”، وقبل ما اقولك اجابة ايهاب.. خليني اقولك حاجة..

 

 خليني اقولك شوية معلومات عن اسامة، انا واثق ان انت متعرفهاش اصلا.. هو كان من عيلة غنية جدا.. خليني اقولك ان الملك فيصل ادي امر بان اي شغل انشاءات في السعودية كلها ياخده محمد بن لا**دن من خلال شركات بن لاد*ن.. ودي فلوس ملهاش عدد.. ورغم الثراء الفاحش دا.. الا ان اسا مة بن لا دن كان عايش طفولة صعبة.. خليني اقولك جزء منها بسيط:

 

– ام اسامه ست شامية .. ومكانتش من حسب ونسب زي حريم ابوه التلاتة .. فكانوا بيقولوله يا ابن الجارية… دا طلعه طفل عنده مشاكل كتيرة مع طفولته.

 

– وهو 4 سنين ابوه طلق امه.. مش بس كدا دا جوزها لواحد مدير في شركاته… فانا عايزك تتخيل وضع الطفل.

 

– وهو 9 سنين ابوه مات في حا *** دثة طيارة… الغريب كمان ..  ان اخوه الكبير مات في حاد*** ثة طي ارة فين .. في امريكا.. كنت كاتب مقال عنه هبقى اعيد نشره..

 

المهم ايهاب رد رد مختصر، وقال: “قال انه قابله مرة واحدة، لان ايهاب كان صديق طارق بن لا ,, دن.. اخو اسامة، وبيقول كان شاب لطيف، مكانش ساعتها بلحية اصلا، وكان لقاء مطولش بس دي المرة الوحيدة اللي قابلته فيها..

 

عشان ينقل على شاه ايران، بالمناسبة امبارح كان موعد وصول الشاه ليستقر في مصر منفاه الاختياري، بعد ما العالم كله تخلى عنه، ايهاب بيقول انه قابل الشاه سنة 1966، وكان جاي من استراليا وراح بيروت فعدى على ايران، واول لما دخل الفندق، قابلوه صحافيين، ونشروا خبر أن الفنان المصري ايهاب نافع في ايران، فالشاه رحب بيه، ودعاه لاستضافته، وقعد معاه، وطار معاه بطيارة فانتوم، واتبسط قوي الشاه لما عرف إن أيهاب طيار.. وصارت صحبة بينهم، الغريب ان  ايهاب مشافهوش تاني لحد ما الشاه مات رغم إنه الشات مات في مصر، والحقيقة انا حلم من احلامي اكتب قصة اسرة الشاه واللي حصلها في رواية.. بس للاسف مصادر كل اقلامي.. بس هكتبها يوما ما.. لان فيها دراما غريبة وعجيبة..

 

هنا ممكن يجي في بالك سؤال، هو ايهاب نافع مستفاد ايه من الصدقات دي كلها.. بص هو جاوب إجابة دبلوماسية.. وقال يكفي انني كنت على مقربة من هؤلاء العظماء الذي غيروا بلادهم، وطبعا دا كلام دبلوماسي وكدا، لكن بغض النظر عن معنى الصداقة الجميل، العلاقات قوة ونفوذ، الف بيت مفتوحلك، والف واحد يدوك عينيهم.. ومصالح بالهبل.. 

 

ايهاب بجانب شغله في الفن والجيش والطيران وفترة في المخابرات، كان كمان رجل أعمال، ورجل أعمال شاطر، لدرجة أن اشتغل في مجال البترول، والحقيقة أن الشغل دا برضه مجاش غير بالعلاقات اللي لسه متكلم عليها.. وخليني احكيلك القصة.

 

بيقول ايهاب في مذكراته نصا: “كنت في لبنان سنة ١٩٧٣ وكان لدي مكتب للتجارة في البناية المركزية ببيروت وكنت أعمل في الأخشاب والحديد والإسمنت، يعني شغال شغل مقاولات.. وكان لدي تعاقد مع رجل الأعمال عبدالله باروم في جدة وبما أنني طيار سابق وأستطيع الطّيران على الهليوكوبتر فقد استطعت نقل هذه المواد بواسطة الطّائرة الهليوكوبتر وذلك بسبب وجود ضغط على ميناء جدة، لدرجة أنَّه في أحد الأيام وصل عدد البواخر الَّتي كانت ترغب في إفراغ حولاتها في الميناء إلى أكثر من ٦٦ باخرة، كلها كانت تنتظر الدّور لتفرغ حمولتها، لذا كانت فكرة نقل البضائع بالهليوكوبتر مبتكرة وجديدة”.

 

تمام.. قو تمام.. بيكمل: “في أحد الأيام وأثناء وجودي في المكتب جاءني رجل يسمى (جو ستيوارت) وهو أمريكي وعرفني بنفسه وقال بأنه من شركة كومسترا الأميركية الَّتي تملك ٧ مصاف صغيرة في كاليفورنيا وقدم لي كارته وهو الChairman في الشّركة وقال أنَّه جاء ليعقد معي صفقة، فقلت له أنَّه غلطان بالعنوان فأنا لا أعمل في البترول”,

 

اللي خلي ايهاب يشك أن الراجل غلطان، في العنوان، أن نفس البناية اللي فيها ايهاب، كان فيها راجل اسمه أنطوان أشقر ولو انت متعرفش مين انطوان اشقر فانا كمان معرفش.. لكن ايهاب بيقول.. كان رجل اعمال لبناني، وبيعمل في البترول وكان عنده مكتب في عمارة ايهاب نفسها في الدور السّادس شقة ٥…  فقال للراجل : “شكلك غلطان في العنوان يا خواجة.. انت قصدك انطوان اشقر”..ولكن الرّجل أصر على أنَّه جه لبنان عشان يقابل ايهاب نافع، وقاله بالامارة.. انت اسمك محمد إيهاب نافع وقاله: “بفضل جواسيسنا نعرف عنك الكثير ولدينا علم بأن وزير البترول السّعودي أحمد زكى يماني صديقك لذلك نحن نطلب منك التّوسط لدى الوزير السّعودي لكي نستطيع شراء شحنات نفط خام من السّعودية ووضع تذكرة سفر..  (بيروت – رياض – بيروت) وثلاثة آلاف دولار على الطرابيزة قدامه، وقاله: “اشمع يا ابن.. الناس..

‫ “احنا عارفين إن الملحق العسكري في السّفارة السّعودية على الشّاعر صديقك  ويقدر يديك فيزا السّياحة بسرعة”..

 

فانتوا عارفين اني صاحب وزير البترول، وصاحب الملحق العسكري في السفارة، وحاجزين تذاكر الطيران، لا انتوا اكيد جايين لانطوان اشقر بس انتوا غلطانين..

 

بيقول ايهاب: “لا أخفيك في بداية الأمر تفاجأت ولكن بعد ذلك اصطحبني معه إلى الفندق الَّذي يسكن به وهو (فينسيا هوتل) وتناولنا الغداء هناك ثم أعطاني رقم التّلكس الخاص به وقال لي في نهاية حديثة: “أتمنى أن تسافر اليوم أو غدًا بالكثير”.

 

ايوة هو دا فايدة العلاقات مصالح.. انت عارف لو تملك معلومة فأنت تملك ثروة كبيرة.. يعني اديك مثال.. فيه ادوية كتير بتدخل جدول كل فترة.. فبالتالي الطلب عليها بيزيد.. لو انت عرفت معلومة الادوية اللي هتدخل جدول قبلها بـ 24 ساعة.. وخزنت منها كمية محترمة.. تقدر تبيعها بأضعاف التمن.. معلومة قد اهو.. تعمل معاك ثروة.. وانت مصاحب الأمم المتحدة كلها.. طبيعي دا يساعدك تعمل ثروة كبيرة.

 

إيهاب بيقول: “عجبني الموضوع خصوصا وهو طريق جديد في التّجارة، المهم ذهبت إلى الفريق على الشّاعر لكي يمنحني الفيزا لدخول المملكة العربية السّعودية على جواز سفري الأسترالي، وأثناء جودي معه أخبرته عن الموضوع فقال أنَّه لا يستطيع مساعدتي في هذا الموضوع ولكن الشّخص الَّذي يمكنه مساعدتي هو الأمير سعد الفيصل فسافرت إلى الرّياض ووصلت بالليل وذهبت من فوري إلى الوزير اليماني (وزي ر البترول)، وعرضت عليه الموضوع لكنه اعتذر وقال لي أنَّه لا يستطيع المساعدة ونصحني أن أذهب إلى الأمير سعد الفيصل؛ لأنَّه الوحيد الَّذي يستطيع مساعدتي وقال أنَّه كلّ يوم صباحًا يأتي هو والأمير سعود ليطلعوا على السّياسة النفطية في مكتبي والكلام هنا مازال للوزير اليماني، فانت تعالي هنا الصبح، وقابله بس انا مقلتلكش حاجة.. وانا عارف الامير يحبك كممثل، واكيد هيدعوك للغدا.. وهناك بقى قوله اللي انت عايزه وانا واثق إنه مش هيرفضلك طلب..

 

ركز كدا.. هي شبكة مصالح.. فلان بيدل فلان.. وعلان يبعتك لعلان.. نفس شبكة المصالح دي هتلاقيها مع حسين سالم مثلا.. انتيم الرئيس مبارك الراجل اللي عمل ثروة بالمليارات من فلوس الدولة.. بس هنعملها بوست لوحده..

 

المهم يعني،  ايهاب قعد في مكتب الوزير اليماني، وجه الامير سعد الفيصل، ولما شاف ايهاب سلم عليه، وقاله يا طويل العمر، والله نحبوك ونحبوا اعمالك.. لازم تيجي تتغدى.. فايهاب قاله طبعا..

 

فايهاب بعد الغدا، قاله ليا طلب عندك واتمنى متكسفنيش.. فقاله والنعم.. طبعا انا مش بعرف سعودي.. بس عمال ارش شوية كلمات سعودي عشان ابان شاطر وكدا.. ومش عارف والنعم دي بتتقال امتى اصلا..

 

المهم، الراجل قاله غالي والطلب غالي.. ما هو طالب بترول يا جماعة..   بس هاخد راي الملك فيصل، فايهاب قاله طبعا طبعا.. قاله بس تروح تتعشى معاه..

 

بيقول ايهاب: “ذهبت في تلك الليلة لتناول العشاء مع جلالته وعندما قدمني الأمير سعد له تذکر والدي وقال (هذا هو بذرة نافع)؛ لأنَّ والدي كان قد عالج عينيه ووالده رحمهما الله وبعد العشاء قام الأمير سعد وجلس بجانب والده الملك فيصل وهمس في أذنه فقال الملك رحمه الله:

“عايز تشتغل في البترول يا ايهاب”.

 

فايهاب قاله: – نعم يا جلالة الملك

 

‫ فالملك فيصل، قال للأمير سعد: – إديله اللي هو عاوزة.

ايهاب بينقل حالة الفرحة اللي عاشها بعد موافقة الملك، وقال: “والحقيقة إنني فرحت جدًا وقلت لجلالة الملك بعد أذنك أريد أن أقبلك فقمت وقبلت جلالته رحمه الله على رأسه وعلى كتفه وخرجت من مجلس جلالته وذهبت مع الأمير سعد في الليلة نفسها إلى مكتبه وبعثت بتلکس إلى (جون) وكانت السّاعة العاشرة مساء وکان مضمون التّلكس (احضر بسرعة إحنا نجحنا).

 

 وحضر جون فعلا تاني يوم، وتمت الصّفقة وكان ثمن برميل النفط في ذلك الوقت ثلاثة دولارات وأربعة سنتا، طيب معلش يعني.. جون هيشتري البترول والسعودية هتبيع.. ايهاب هيستفيد ايه.. هنا انت متهور واهوج يا صديقي.. السعودية هتبيع لايهاب وايهاب يبيع لجون وياخد عمولة.. كام العمولة بقى..  و ٥ سنتات للبرميل…

 

طبعا انت جايز تقول دا مبلغ قليل.. بس لما تعرف أن ايهاب مش هيعمل حاجة اصلا.. هو اسمه عـ الورق بس.. والشحنات تمت في شهر أغسطس وسبتمبر وأكتوبر… بس عشان النبر اللي احنا نبرناه.. شهر أكتوبر دا كان سنة ١٩٧٣… وزي ما انت عارف إن يوم 6 أكتوبر 1973.. حصلت حرب اكتوبر.. ويوم ١٤ أكتوبر استعمل الملك سلاح البترول للضغط على أمريكا أثناء حرب ١٩٧٣ بسبب مساعدتها لإسر********ائيل وقال قولته المشهورة “أنه سيوقف البترول وسيرجع للخيام، وليس لديه مانع من حرق البترول”..

 

وهنا تسألني وتقولي ايهاب عمل ايه لما عرف بقرار وقف البترول دا..  ودي فيها كلام طبعا نط في اول طيارة على السعودية..

 

بيقول: “قابلت للملك وطلبت منه ميكونش القرار باثر رجعي”، يعني العقد بتاعه ميتضررش.. طبعا الملك بهدله، لانه موقف اناني، البلد بل العرب كلهم بيحاربوا، حرب وجود، وانت بتدور على مكاسب شخصية، فالملك رد عليه: “أنا أفعل ذلك من أجلكم لكي لا ينضغط عليكم في الحرب؛ لأنَّه لا يوجد لدي سلاح أضرب به أمريكا وأنت كضابط عسكري تقول لي نلتزم بالعقود”، فايهاب قاله طيب على الأقل الموضوع ميشملش العقود القديمة، يعني متمضيش معاهم عقود جديدة، بس خلى العقود القديمة..

 

فالملك قاله بشكل قاطع: “سوف اقطع جميع عقود البترول مع امريكا.

 

بيقول إيهاب أن القرار دا وصل سعر برميل البترول لـ 40 دولار… مع أن سعره كان 3 دولار بس.. وهنا ايهاب بيقول أن الملك فيصل كان راجل جرئ وطني جدا، ولولاه مكانش الموقف العربي مؤثر في الحرب..

 

طبعا مش محتاج اقولك إن الملك فيصل اتقتل بعد الموقف دا بسنة ونص، في  25 مارس 1975،، واللي اغتاله كان ابن اخوه اللي اسمه فيصل..

 

هنا ايهاب هيقابل الملك فيصل وابن اخوه اللي ق** تله قبل الاغتيال بـ 6 شهور.. لكن زي ما انت عارف.. فيم مم وفيه بامبرز لازم يتجاب.. فنخلي دا بكرا واروح اشوف شغلي..

 

شكرا

 

الجزء 12

ايهاب نافع – المخابراتي الوسيم 12

 

 وقفنا امبارح أن إيهاب نافع، قابل الملك فيصل رحمة الله عليه قبل اغتياله، بيقول ايهاب إنه كان في مجلس الملك فيصل قبل 6 شهور، وكان قاعد في المجلس ابن اخو الملك الامير فيصل، وطبيعي نسأله بما انك راجل ظابط وبتتاجر في البترول وبتكسب 5 سنت.. ملاحظتش حاجة على الامير فيصل ابن اخو الملك..

 

فايهاب قال: “رأيته في جلسة مع مجلس الأمراء، ولم اتعامل معه، ولكنه كان في الجلسة كثير التهريج وضحك كثيرا”، وهنا برضه نسأل سؤال مهم قوي، تفتكر يا استاذ ايهاب، للمخابرات الامريكية دور في اغت** يال الملك فيصل، فايهاب قال: “طبعا مية في المية، لان الملك كان عادل وكريمة وغيور على عروبته واسلامه”..

 

بس هنا اللي قتل الملك هو ابن اخوه، فنسأل ايهاب سؤال تاني، وقاله: “تفتكر هي اجهزة المخابرات تقدر تغسل مخ واشخاص شخص عشان يعمل حاجة معينة”، والحقيقة قبل اجابة ايهاب، مش بس اجهزة المخابرات دا الإعلام نفسه بيعمل كدا.. تامر أمين، ليه مقولة: “من الاخر احنا الاعلاميين شياطين، احنا نعرف نقلب الحق باطل و نقلب الباطل حق، ومرة نبقى محامي الشيطان، ومرة نبقى ملاك بجناحات”… والناس نواحينا بين طيب وبين جاهل وبين مؤمن بنظرية المؤامرة، وسهل جدا تعبي راسه..

 

المهم يعني ايهاب، قال نصا: “نعم فهناك علماء نفس وأطباء يستطيعون دراسة نفسية الشّخص ومن خلال ذلك يستطيعون التّأثير عليه وتجنيده لعملية ما… وهنا كان مهم يسأله، طيب واحنا في مصر في مخابراتنا العامة، نقدر نعمل كدا.. عندنا الامكانية دي.. فايهاب فكر شوية.. وسكت شوية.. وبص يمين وبص شمال، وقاله رد عميق جدا: ” لا أعلم..!”.

 

ويبدو ان ايهاب تدارك موضوع وهو بيحكي، فقرر يحكيلنا عن المرة اللي كان هيعمل ازمة دبلوماسية بين مصر وامريكا..

 

طيب ايه القصة

 

في سنة ١٩٥٩ جه مصر الرّئيس الامريكي دوايت أيزنهاور الَّذي كانت فترة رئاسته قد انتهت وقتها (ايزنهاور مسك الحكم من سنة 1953 لسنة 1961) في زيارة سرية عشان يقابل الرّئيس جمال عبد الناصر واتطلب من ايهاب بصفته طيار الريس، يصطحب ايزنهاور، من الممر ٣٦ في مطار ألماظة والذهاب به إلى قصر القبة بالهيليوكوبتر والريس عبد الناصر كان في انتظاره.

 

وفعلا الراجل جابه ووصله لكوبري القبة، وعبد الناصر استقبله، ودخل بيه القصر، فايهاب خد الطيارة ورجع تاني لمطار الماظة، وبعد كام ساعة كلموه قالوله تعالى خد ايزنهاور، رجع طيارته.. جه ايهاب وركبه الهليكوبتر، فايزنهاور قاله لو سمخت كابتن ايخاب.. ممكن وريني خرم من فوق.. فايهاب طبعا مش هيرفض للراجل طلب.. دا ضيف يعني.. وضيف الريس..

 

فراح طاير فوق الاهرامات، وقعد يلف فوقيها يمين وشمال، ويعمل حركات دائرية فوق الهرم، ولا كإنها زفة ايزنهاور، وهو كان بيبص عالهرم بإعجاب شديد.

 

وهنا المفروض المسافة من قصر القبة لطيارة ايزنهاور، 7 دقايق، وحرس الرئيس الامريكي ومرافقوه اتبلغوا ان الرئيس اتحرك، لكن ايهاب خد 17 دقيقة، فطبع حرس الرئيس الامريكي قلق، لا يكون حصل حاجة للراجل بتاعهم، وهنا دي مصيبة، اولا مفيش تنسيق مع الجانب المصري، مفيش تنسيق مع الجانب الامريكي، وايهاب عامل يكروس بالطيارة فوق الهرم..

 

طبعا الرئيس الامريكي مع ناس من السي اي ايه..  Central Intelligence Agency يعني المخابرات الامريكية.. المهم وصل ايهاب للمطار بالرئيس الامريكي، فلقى رجالة السي اي ايه شايطين، وشوية ووشوهم هتطلع نار، ففيه واحد منهم، قرب من ايهاب وشتمه بالانجليزي وقاله مازر فاكر، طبعا ايهاب عنده بتاع 5 لغات، راح شاتمه بالانجليزي يور جراند مازر فاكر،

 

 وخد الريس بتاعه ومشي، لما رجع ايهاب لعبد الناصر، قاله انت ليه موصلتش الراجل في ميعاده، قاله هو طلب يلف فوق الاهرامات وانا مرضتش اكسفخ، فقاله بس اللي انت عملته امنيا غلط، انت كدا كنت هتعملنا مشكلة، فقاله 

 

“دا ريس يا ريس، وضيفك، وانا معرفبتش ابلغ الكطار باللاسلكي، لان فيه خطورة امنية لو بلغت المطار، فالريس قاله طيب يا ايهاب حصل خير.

 

وهنا بما ان الكلام جه ع الرئيس الامريكي، كاتب المذكرات ايمن الصياد، ساله، انت قلت انك من انصار تبديل السلاح الروسي بالامريكي، هل دا حصل فعلا.. هل سعيت لدا.. بما انك قريب من الريس يعني..

 

فايهاب قال نصا: “كنت أحاول تغيير تسليح مصر من الأسلحة الرّوسية إلى الأسلحة الأمريكية وكان ذلك في ٢٧ فبراير ١٩٨٢؛ لأنَّه إلى عام ١٩٨٢ كان تسليح مصر من روسيا وكانت المدفعية الرّوسية في ذلك الوقت ١٣٢ ملم ذاتية الحركة أما الأميركيين فكان لديهم مدفعية ١٥٥ ملم، هذا الموضوع أخذ معي سبعة أشهر لكي أنجزه، وبحوزتي وثيقة من القيادة المصرية تقول بأني مخول بالتفاوض مع البنتاجون (وزارة الدفاع الامريكية)، حتَّى توقيع العقد، وعند الانتهاء من التّفاوض سوف تقوم  الحكومة المصرية بتوقيع العقود.. طيب حصل ايه يا إيهاب..

 

بيقول وفعلا وقعنا العقد لشراء المدفعية الأمريكية بـ ١٧٦ مليون دولار، وبعد ثلاثة أشهر تم شحن المدافع ولكن للأسف اكتشفنا أن نصف المراكب ذهبت إلى ولاد العم.. ليه يا عم، قالك “لأنَّهم لم يقبلوا أن تزود مصر بهذا السّلاح إذا لم تزود به ولاد شالوم أولا”، وجاء ذلك أثناء تفاوضي معهم.

 

احنا كدا خلصنا الجزء الخاص بالحاجات السياسية والعسكرية، واللي جاي ليه علاقة بالفن، وبالجوازات، وبالاعمال الفنية وبالحكايات.. وعشان مناخدش وقت كتير.. فانا هكمل فيه دلوقتي.. ونكمله بكرا..

 

 الحقيقة السؤال اللي ممكن يجي في بالك، واحد ظابط جيش، وطيار، وراجل ميسور ماديا، ماله بالفن، يعني ايه العلاقة، ايهاب نافع بيقول ان صلاح ذو الفقار ابن خاله (لان ام ايهاب من بيت ذو الفقار.. ما انا حكيتلك في الاول بس انت نسيت)..  وكان دايما صلاح يشجع ايهاب يشتغل في الفن، ويقوله دا انت لو اشتغلت في الفن هتضرب.. بالمناسبة صلاح كمان كان ظابط شرطة..

 

مع ضغط صلاح ذو الفقار عليه، قرر ايهاب يضخع لاختبار تمثيل مع المخرج ابراهيم عمارة في ستوديو نحاس لمدة 8 دقايق، وساعتها مراته ماجدة (ايهاب اتجوز ماجدة قبل ما يمثل اصلا)، حمضت الشريط الـ 8 دقايق، وعزمت المنتجين والمخرجين وحبايب الحبايب تفرجهم عليه.. ودا كان في يونيو 1963.. وفي السهرة دا مضى ايهاب بطولة 4 افلام كلهم بطولة مطلقة ليه.. هو من اول ما اشتغل عمل افلام بطولته..

 

اول فيلم ليه كان اسمه الحقيقة العارية واتصور بين اسوان واسكندرية.. وطبعا بطولة ماجدة.. والفيلم دا  بيحكي عن آمال المرشدة السياحية (ماجدة)، لكنها مضربة عن الزواج بسبب تجربة طلاق أمها، فتروح آمال مع وفد سياحي لزيارة السد العالى وتؤجل السفر للولايات المتحدة، وهناك تلتقي بالمهندس أحمد (ايهاب نافع)، بالصدفة بعد اقتراب وقوع حادث لها وتدخل أحمد في الوقت المناسب لإنقاذها، فيحبوا بعض.. وبالمناسبة دا اخر فيلم اتصور في معبد ابو سمبل قبل ما يتنقل، ولو متعرفش قصة نقل معبد ابو سمبل فانت فايتك قصة من اكثر القصص المثيرة في تاريخ الاثار المصرية… فدا وثيقة سينمائية مهممة..

 

ساعتها صلاح ذو الفقار ورشدي اباظة، قالوله لازم تعمل معايشة للدور، لازم تروح مع مهندسين السد العالي، عشان تلقط منهم تفاصيل الشخصية، ويبقى ادائك طبيعي، وفعلا راح هناك وكان فيه 11 مهندس وهو كان الـ 12 بتوعهم..

 

بيحكي انه اثناء التصوير، كانت ماجدة واقفة ووراها رافعة رمال، الرافعة دي كانت هتقع عليها فعلا مش تمثيل. فايهاب جري وانقذها… الغريب ان عاطف سالم كان بيصور وصور الواقعة جي وحطها في الفيلم وهي مكانتش في السيناريو..

 

وعاطف سالم قرر يجيب دكتورة تقيم في اللوكيشن عشان تعالجهم، لو حد جاله لطشة شمس من حر اسوان، جيس وات الدكتورة هي اللي جالها ضربة شمس..

 

لكن ايه هيحصل بعد كدا.. دا نحكيه بكرا.. لان زي ما قلتلك اب واعول وورايا شغل..

 

سلام

 

#بهاء_حجازي

الجزء 13

إيهاب نافع المخابراتي الوسيم 13

 

زي ما قلتلك امبارح إن فيلم لإيهاب نافع كان الحقيقة العارية، وزي ما قلتلك أن اللي اقنعه بالشغل في السينما كان ابن خاله صلاح ذو الفقار اللي كان ظابط شرطة، ضيف عليهم أحمد مظهر اللي اصلا كان ظابط جيش، ويوسف السباعي ظابط الجيش كان بيكتب، وعز الدين ذو الفقار واخوه محمود ظباط الجيش كانوا بيخرجوا ويمثلوا، فالسؤال هنا ليه كل الظباط دول دخلوا السينما..

 

إيهاب بيقول أن في الفترة دي كان فيه نقص في الوجوه السينمائية في مصر، ومكانش ع الساحة غير عدد محدود من الممثلين الوسيمين، بيقول مكانش فيه غير عمر الشريف، وشكري سرحان (بقولها بصوت واطي عشان عمر متولي ميزعلش)، وكمال الشناوي، ورشدي أباظة وأحمد مظهر، وبعدين قال وأنا (قصده على نفسه مش عليا.. انا وسيم بس ممثلتش)… لكن دلوقتي الممثلين اكتر من الرز.. انا مش مزعلني منك يا استاذ ايهاب.. غير انك نسيت أحمد رمزي..

 

وهنا برضه مهم نسأل سؤال مهم، هل فيلم الحقيقة العارية نجح، بص هو في مصر مفيش احصاء دقيق لاي حاجة، احنا اصلا أعداء علم الاحصاء والارشيف، بص احنا بنعادي العلم بشكل عام، بس ايهاب بيقول زمان الفيلم اللي يقعد 6 أسابيع يبقى نجح، بس فيلم الحقيقة العارية قعد 26 اسبوع في السينما.. ونجح جماهيريا ونقديا.. وانا كـ راجل بتاع فن.. امبارح اتقالي احتفظ برأيك لنفسك.. اقدر اقولك معرفش الكلام ده حقيقي ولا لا.. بس بالنسبالي الفيلم لطيف.. وانا بحب افلام عاطف سالم وهو من الفلتات في مصر..

 

الفيلم الثاني ليه كان هجرة الرسول صلى الله عليه وسلم، الغريب أن الفيلم دا اصلا المنتجين بتوعه مسيحيين رفائيل جبور وكمال قعود، ودا عادي يعني، هي ملحوظة هو اوردها، والحقيقة انا مش بحب الفيلم دا.. ومش عارف ليه..

 

بيقول أن رفائيل جبور وكمال قعود مسيحيين من لبنان، وحبوا يعملوا افلام عن الإسلام، فعملوا الفيلم دا، واثناء الشغل فيه، كانوا بيكتبوا فيلم الراهبة، وقالوله انت بطله مع هند رستم، وكان اول ظهور لشمس البارودي، وقال أن الفيلمين نجحوا وبيتعرضوا دايما في المناسبات الدينية..

 

 المهم يعني، تالت فيلم ليه كان فيلم للرجال فقط، مع سعاد حسني ونادية لطفي، ودا الفيلم الوحيد اللي ماجدة قالت أنها مبتحبوش لايهاب نافع.. اللي هو الفيلم بتاع البريما لما سعاد حسني ونادية لطفي يعملوا رجالة ويروحوا يشتغلوا في الصحرا عشان يثبتوا ان الست تقدر تعمل كل حاجة زيها زي الراحل، ومرة مرتضى منصور كان في لقاء تلفزيوني، فسأله عن الوزير محمد محسوب، فقالهم: ” دا شبه سعاد حسني لما كانت عاملة دور ”راجل” في فيلم ”للرجال فقط”.. والحقيقة انا مش عارف ايه علاقة دا بدا.. بس ماشي يعني.. انها مصر. 

 

بيقول كمان إنه مثل مسلسل استرالي من 68 حلقة، كان هو بطل 34 حلقة منهم واسمه باربرريف، وبسببه حصل على الجنسية الاسترالية، وبيقول إجمالي اللي مثله كان 14 فيلم ومسلسل اجنبي، ومسلسلين عربيين هما النوق البيض، والوسادة  ما زالت خالية..  والاخير دا مسلسل إذاعي، بطولة لبنى عبد العزيز وسمير صبري، وبيعالج نفس رواية إحسان عبد القدوس اللي اتعملت فيلم باسم الوسادة الخالية بطولة عبد الحليم حافظ.. وكمان مثل فيلم تركي لبناني اسمه طريق بلا نهاية..

 

 ولما ساله ايمن الصياد، اي اهم عمل لقلبك، قاله طريق بلا نهاية، ليه بقى؟ قال لان دا فيلم بظهر فيه بشخصية عكس شخصيتي، وكمان عادل امام أعاد تمثيل الفيلم باسم “الجحيم”.

 

فيلم طريق بلا نهاية، بيحكي (رمزي – ايهاب نافع) اللي بيعثر بالصدفة على حقيبة مجوهرات سرقها بعض اللصوص، ليأخذها ويسافر بها إلى مدينة أخرى، حيث يقيم هناك بفندق صغير، ويتعرف هناك على زوجة صاحب الفندق، والتي تطلب منه مساعدتها في التخلص من زوجها العجوز، لكن بيتعرف على بنت العجوز دي ويحبها..

 

ودي فعلا نفس قصة فيلم الجحيم، لان الاتنين مقتبسين من رواية “ساعي البريد يدق الجرس مرتين”، للروائي الزميل جيمس إم كاين، واللي اتقدمت فيلم سنة 1946، من إخراج تاى جارنيت، والحقيقة ولا فيلم طريق بلا نهاية ولا فيلم الجحيم ذكروا ان القصة مقتبسة من الرواية.. فبتأسف لزميلي جيمس كاين..

 

بيحكي ايهاب إنه كان صديق مقرب للفنان فريد الاطرش، وقال إنه كان من اسباب الصلح اللي حصلت بين فريد وعبد الحليم (هنزلك مقال كامل عن قصة الخناقة والصلح)..

 

ايهاب بيقول أن فريد كان مغرم في حياته بحاجتين البنات ولعب القمار، وبغض النظر اني مش شايف ليه لزمة يقول كدا، بس فريد اعترف ع الهوا إنه كان مدمن قمار وبطل، وبرضه قصص غرام فريد كتيرة جدا.. هو كان شخص عاطفي زي أحمد المرسي صاحبي..

 

بيقول إنه مرة كان في بيروت سنة 1966… وايهاب معاه عربية مرسيدس sl230 كانت مكشوفة… وكانوا بيروحوا يسهروا في الكازينو، وفي مرة فريد فضل يلعب يلعب  لحد الساعة 4 ونص وخسر 196 الف ليرة لبنانية .. فكتب شيك بالمبلغ.. وطبعا معندوش في حسابه اللي يغطي الشيك.. ولو راحوا بالشيك البنك هياخدوه رفض.. وهيشتكوه.. فايهاب قاله هيروحوا البنك وهيعرفوا أن مفيش فلوس..

 

ففريد ركب العربية وقاله تحب اغنيلك.. فايهاب قال ايه دا احنا في ايه ولا ايه.. بس قاله غنيلي “بحبك.. بقربك.. ببعدك”.. فغناها ونام في العربية.. المهم، وصلوا لمطعم فطروا، وبعدين ايهاب ساله هنروح فين.. قاله تعالى نروح لعالي (صديق خليجي).. راحوا هناك قعدوا شوية . وبعدين فريد همس في ودن الراجل الخليجي.. وبعدين الراجل ضحك.. وطلع فوق جاب كيس فلوس واداه لفريد الاطرش..

 

وانا هموت واعرف ايه الحاجة اللي تقولها في ودن واحد فيضحك ويديك كيس فلوس..  المهم يعني فريد كان نايم على نفسه، فقال لايهاب خد الـ 196 الف ليرة دول حطهم في حسابي في البنك.. عشان انا نايم على نفسي.. راح ايهاب فعلا يعمل ايداع.. فموظف البنك قاله كام دول قاله 196… لكن الموظف عدهم لقاهم 500 الف ليرة..

 

ايهاب بيقول اني لو قلت لفريد ع المبلغ اللي اتحط في حسابه هيلعب تاني.. فقاله 196 الف حطيناهم وصرفوهم.. يعني فريد كان في حسابه باقي الـ 500 بس ايهاب خبى عليه الموضوع… لكن فريد قاله طيب وريني الوصل.. وريني مورينيش.. لغاية ما فريد شاف الوصل.. وعرف المبلغ.. فراح طالع يلعب.. راح خسران 163 الف ليرة…

 

والحقيقة اننا بشر كلنا لينا اخطاء، وكلنا بنغلط، المهم اللي يعترف بغلطه ويتوب عنه، بس هنا برضه مهم نسال ايهاب المقرب من حليم وفريد عن أي سبب الخلاف ما بينهم.. الكل فاكر أن الخلاف كان على حفلة الربيع.. بس ايهاب حكي قصة تانية خالص.. دي بكرا إن شاء الله..

 

 لو صادفك البوست دا ولقيت فيه معلومة جديدة عليك.. متنساش تسيب لايك او كومنت عشان الريتش وعشان البوست يوصل للناس .. لان دا بيدعم المحتوى هنا

 

 

 

الجزء الرابع عشر

جوازات إيهاب نافع

ايهاب بيقول أن قصة الخلاف بين فريد وحليم بدأت من فرح بنت المشير عبد الحكيم عامر، بنت المشير كانت بتتجوز واحد اسمه الدكتور محمد عزب، ومحمد عزب دا صديق ايهاب نافع، بيقول انه في اليوم دا كان ايهاب قاعد في شقته المطلة على النيل، والعمارة كانت لازقة في فندق شيراتون، وكان الكاتب محمد حسنين هيكل، ساكن فوق ايهاب، في اليوم دا سمع صوت طرق شديد على باب شقته، ففتح لقى فريد الاطرش قدامه، وقعد فريد يبكي، فساله ايهاب مالك: “حطيت كل فلوسك في لاعب كورة، وطلع رجليه الاتنين شمال”، قاله لا”

– تصور يا ايهاب.. عبد الحليم منعهم يدعوني لفرح بنت المشير عشان ما اغنيش ويكون هو نجم الفرح..

فايهاب قاله طيب الحل عندي، هو مين العريس مش دكتور محمد عزب، دا حبيبي الروح بالروح، واصبر كدا..

راح متصل ايهاب بدكتور محمد العزب، فمحمد قاله ازعى متجيش الفرح، قاله جاي، بس انت ليه معزمتيش فريد، فقاله والله انا ما عزمت حد.. المعازيم عزمهم علي شفيق… وعلي شفيق مدير مكتب عبد الحكيم عامر، وهيتقتل في لندن زي موتة سعاد حسني واشرف مروان والتلاتة في لندن.. ابناؤنا في الخارج..

المهم يعني فمحمد عزب، قاله خلاص انا اعزم فريد ولا تزعل، وعزم فريد يحضر الفرح.. وايهاب قال لفريد متقولش لحد وخليها مفاجأة يوم الفرح..

ايهاب وهو صاحب الاتنين، بيقول ان حليم كان متضايق، وقال لايهاب مين اللي عزم فريد، فايهاب قاله: “مش هتبطل حركاتك دي يا حلموزة (دلع حليم)، وهو كان بيدلع فريد بـ فري.. ورشدي بـ برودي..

فحليم قاله حركات ايه.. قاله ليه تمنعهم يعزموا فريد، حليم قاله: “يعني انت اللي عملتها.. طيب طيب يا ايهاب”.. بيقول ايهاب.. هو قالهالي طيب طيب.. بصيغة تهديد لكنه معملش حاجة..

بل ان حليم تعاقد مع ايهاب نافع على بطولة فيلم الراهبة، وكان حليم منتج الفيلم مع عبد الوهاب، وغنى فريد ساعتها في الحفلة وكان سعيد جدا..

وسأله الكاتب، هل عبد الحليم اتجوز سعاد حسني، فقاله: “سمعت انهم اتجوزوا عرفي”،  وبرضه قال: “الفنانين اكثر الناس عرضة للشائعات، وسمعت اشاعة ان سعاد شغالة في المخابرات، لكن والله عمري ما شفتها في جهاز المخابرات”.

وهنا ساله، سمعنا ان فيه اشاعة ان المشير عامر كان بيحب وردة، فقاله محصلش، الراجل كان بيحب مراته الفنانة برلنتي عبد الحميد، وانا حضرت فرحهم، وخلف منها ولد اسمه عمرو، شديد الشبه بابوه، بالمناسبة برلنتي عبد الحميد عاملة كتاب اسمه انا والمشير.. ممكن نبقى نحكي قصته..

فهنا برضه سأله، وقاله: طيب عبد الناصر كان موافق على جواز المشير من برلنتي، فقاله لا، ليه.. فقال ايهاب: “لانها فنانة، وكان لا يريد لعبد الحكيم عامر، ان يرتبط بفنانة، ربما لظنه ان ذلك لا يليق بمكانته ووضعه السياسي.. والحقيقة في لقاء مطول لبرلنتي مع عمرو الليثي قالت نصا: “عبد الناصر كان مسجلي شريط في اوضة نومي انا وجوزي، وحاطه في الخزنة بتاعته”..

جوازات ايهاب نافع يا سيدي، حسب ما هو قال 11، وإن كانت بعض المواقع بتقول انهم 13، وان كانت غادة بنته، بتقول انه كان دايما يجي يزورنا انا وامي، وكل مرة يجي بست مختلفة، يعرفها لينا انها مراته.. لكن انا هلتزم باللي هو قاله.. 11 ست.. لكل واحدة قصة.. حسب ما حكي في مذكراته..

الاولى

ساله ايمن الصياد، عن العلاقات العاطفية في حياته، فقاله كنت بروح النادي، وكان في بنت انجليزية اسمها لوسي، فصاحبتها ودي اول بنت في حياتي، لكن متجوزتهاش..

بيقول ان اول زواج في حياتي، كان ف 10 اغسطس 1955، ودا كان من السيدة الفت خليل، وكان ابوها دكتور صاحب ابويا، وكنا بنتقابل في نادي المعادي الرياضي، (سنة 55 ايهاب كان لسه متخرج).. بيقول ولا امها كانت موافقة عليا.. ولا امي كانت موافقة عليها.. الله ع الترابط الاسري.. لكن اتجوزها بدون رضا امها ولا رضا امه..

البنت لما امها رفضت امتنعت عن الاكل خالص، لحد ما رفعت خالص، فلما البنت لقت بنتها هتموت، قالتلها اتجوزيه، فراح اتجوزها وشالها لانها كانت ضعيفة جدا، وفضل الجواز بينهم 5 سنين.. وطلقها سنة 1960.. ليه يا عم ايهاب.. قالك عشان كانت عصبية جدا.. وكانت بتغير عليا جدا.. وخلفت منها ابني ايمن.. وهو دكتور جراح ممتاز..  اما الزواجة التانية فكانت من الفنانة ماجدة.. ولنا عندها وقفة.. لكن بكرا ان شاء الله..

دا الجزء رقم 14…

#بهاء_حجازي

الجزء الخامس عشر جوازة ماجدة وايهاب نافع

حكينا امبارح قصة الزوجة الاولى من الـ 11 زوجة، حسب كتاب لعبة الفن والمخابرات مذكرات ايهاب نافع، والزوجة التانية للفنان إيهاب نافع كانت الفنانة ماجدة..

ناس كتير فاكرة انهم مثلوا مع بعض وبعدين اتجوزوا، لكن العكس، هو اتجوزها قبل ما يمثلوا مع بعض اصلا.. وهو يعني مش بعيد عن العيلة الفنية، ابن خاله كان صلاح ذو الفقار.

وإيهاب حكي انه مع ضغط صلاح ذو الفقار عليه، قرر  يخضع لاختبار تمثيل مع المخرج ابراهيم عمارة في ستوديو نحاس لمدة 8 دقايق، وساعتها مراته ماجدة، حمضت الشريط الـ 8 دقايق، وعزمت المنتجين والمخرجين وحبايب الحبايب تفرجهم عليه.. ودا كان في يونيو 1963.. وفي السهرة دا مضى ايهاب بطولة 4 افلام كلهم بطولة مطلقة ليه.. هو من اول ما اشتغل عمل افلام بطولته..

المهم يعني، السؤال هو عرف ماجدة ازاي أصلا..

بيقول انه قابل ماجدة عند عز الدين ذو الفقار ابن خاله، وكانت رايحة تتفق معاه على فيلم، بس الفيلم متمش اصلا، وبعد كدا قابلها في جهاز المخابرات، ايه ضا .. الفنانة ماجدة رايحة جهاز المخابرات تعمل ايه.. قالك كانت بتدور على قصة تنفع فيلم سيما، فراح مقابلها ايهاب، قالتله مش انت.. قالها انا، وعرض عليها 3 قصص، فاختارت قصة جميلة بو حيرد، والكلام دا سنة 1957.. وكان مخرج الفيلم يوسف شاهين، واللي طلب 20 الف عسكري، يكونوا تحت امره ويسمعوا كلامه، لكن ايهاب قال دا طلب مستحيل، فادوله 50 عسكري بس..

ولينا هنا وقفة، بمناسبة فيلم جميلة بو حيرد.. بيتنشر بوست كل شوية الفيلم الذي انقذ جميلة، والحقيقة المعلومات اللي في البوست دا ساذجة جدا، جميلة اصلا اتخفف عنها الحكم قبل عرض الفيلم اصلا، اه الفيلم عمل صدى قوي جدا بس مالوش علاقة بعملية الإعد** ام… خالص.. كمان جميلة نفسها مش بتحب الفيلم، وبتقول انه مبالغ فيه.. كمان جميلة لما جات مصر.. مقابلتش ماجدة.. ولا سعت لدا..

بيقول ايهاب ان الفيلم اتعرض في لبنان، والحكومة الفرنسية، ضغت على لبنان لمنع عرضه، واتمنع عرضه، فراحت ماجدة للجهاز، وبيقول عرفت بعلاقاتي ارجع الفيلم للعرض، والمرة التالتة كانت بنت الرئيس الروسي خروتشوف في زيارة لمصر، فاختاروا ايهاب نافع لمرافقتها، فعملوا حفلة في السفارة الروسية، وعزموا فماجدة، فماجدة شافته قالتله انت، قالها انا.. قالت في نفسها ايه الواد اللي كل ما اروح حتة يطلع هناك دا.. تكونش عمرو بيلا..

بيقول انه كان مصاحب المنتج اللبناني تاكفور انطوينا، وكان كل ما تاكفور يقابله، يقوله يا ايهاب ماجدة معجبة ما تتجوزها ولا هتاكفور.. يقوله ماشي بس اديني فرصة اتاكفور شوية..

بيقول من كتر زن تاكفور عليا، قررت اني اتقدملها خصوصا اني كنت مطلق ام ايمن، فقرر يخطبها وفضلت الخطوبة شهرين.. وبعدين تم الجواز..

ماجدة بتقول قصة غير كدا خالص، انه قابلها في حفل السفارة فعلا، ووصلها بالعربية، ولما وصلت قالها تتجوزيني.. بس مش موضوعنا يعني..

هو بيقول ان ماجدة باعتبارها فنانة ومنتجة، كانت دايما بتتدخل في شغله، وتنصحه يمثل ازاي ويعمل ايه.. ودا كان مسببله مشكلة يعني، بيقول حتى مرة، المخرج عاطف سالم، قالها: “سيبيه يا ماجدة يمثل بطريقته، كدا انتي هتخليه يمثل بطريقتك”..

بيقول انه لما خرج من مصر، زي ما حكيتلك قبل كدا نقل شغله كله لبنان، وطبعا ماجدة صعب تروح تعيش في لبنان باعتبار ان شغلها وحياتها كلها هنا، فقال قلت مفيش داعي افضل معلقها، فطلقتها.. بالمناسب ماجدة متجوزتش غيره ولا بعده.. وفضلت توده طول عمرها.. وبتعزمه هو ومراتاته عشان يشوف غادة بنته..

فضل ايهاب لمدة سنة ونص من غير جواز بعد ماجدة.. ودي فترة طويلة قوي بالنسباله، لحد ما قابل بنت استرالية اسمها “ديل”، كانت مع فوج استرالي في لبنان، حبها اعجب بيها، وقال ياض ما تسافر معاها استراليا، بس لانه جدع، اتجوزها في لبنان قبل ما يروح معاها استراليا.

فقدم طلب هجرة لاستراليا، كممثل او كطيار، فقالوله والله يا بني احنا معندناش افلام اصلا، احنا بنجيب الافلام جاهزة من انجلترا، بس وافقوا على طلب الهجرة اللي قدمه، ولقاهم مشغلينه شغلانة غريبة خالص..

ايه دا.. وهيحصل ايه.. دا بكرا إن شاء الله..

#بهاء_حجازي

 

 

 

 

 

 

 

 

 

 

 

 

 

 

المخابراتي الوسيم – ايهاب نافع 15

احنا عرفنا قصة الزوجة الأولى اللي هي ام ايمن وقصة الزوجة التانية ماجدة، والزوجة التالتة ديل الاسترالية واللي قدم معاها على طب هجرة لاستراليا، وكتب إنه بيعرف يشتغل طيار وممثل، فقالوله مفيش تمثيل احنا بنجيب الأفلام جاهزة من برا، فقالهم خلاص ماشي.. فتوقع يعني أن الشغلة اللي في انتظاره هي طيار..

لكنه لما اراح ادارة التوظيف حاجة كدا زي القوى العاملة عندنا بتبعته مصنع دنلوب بتاع كاوتشات العربية عشان يسوق عربية ينقل بيها الاطارات من مكان لمكان… يعني لقى نفسه سواق عربية نقل… صعبت عليه نفسه.. من ممثل وطيار الرئيس لواحد شغال على عربية نقل وفي بلد تانية.. فمرضيش.. وقرر يشتغل بالتجارة..

هو كان راح يتفسح في هونج كونح، فلقى هناك البضايع رخيصة، ففكر يجيب منتجلات من هونج كونج، ويبيعها في استراليا، وخدت توكيل ادوات تجميل وستاير جاهزة وادوات مطبخ، وبدأ يوزع المنتجات دي هناك.. بيقول أن تجارته ربحت لدرجة إنه كان بيبيع البضاعة وهي في المينا قبل ما تنزل اصلا..

بيقول إنه بدأ التجارة بـ 4 الاف دولار بس.. وخلال 7 شهور كان راكب الرولز رايس.. متهيألي إيهاب نافع حقق كل الاحلام اللي أي شاب يحلم بيها.. عمل كل حاجة تقريبا..

المهم يعني، فيه واحد قابله هناك وعرض عليه يشتغلوا سوا في التجارة، فنصب عليه في 165 الف دولار، على اساس يجيب بضاعة من الارجنتين، وراح ومرجعش.. ايهاب قعد يدور ع الراجل دا… وبعدين وقف قدام التلفزيون الاسترالي طالبين ممثلين لمسلسل استرالي اسمه باربرريف، فراح قدم واتقبل، ووافقوا عليه وادوله 200 دولار في الاسبوع لمسلسل من 68 حلقة، لكنه مصورش غير 34 حلقة في سنة ونص.. واول ما اتعرضت الحلقات، لقوا مكتب الهجرة، بيتصلوا بيه.. تعالى فورا..

قالوله احنا باعتينلك لدنلوب تسوق عربية رايح تمثل ليه.. فقالهم انا كاتب في ورق الهجرة اني طيار وممثل.. انا هرجع مصر دلوقتي وهعمل حوار صحفي مع كل وسائل الاعلام واقولهم ان الهجرة لاستراليا خدعة .. وقتها كانت فكرة الهجرة شغالة على ودنه.. ففيه موظف كبير سمعه قاله مستر ايهاب تعالى.. فحكاله المشكلة.. فالموظف قاله خلاص متزعلش نفسك.. ومنحوه الجنسية الاسترالية.. ودا سنة 1969..

المهم يعني هو طلق ديل ليه.. ما الست وشها حلو عليه.. خدها وخد الجنسية ومثل وبقى غني.. وكمان معاه رولز رايس.. قالك والله ديل دي مشكلتها انها بتشرب كتير. ولما بتشرب كانت بتقول كلام قبيح جدا.. وانا حذرتها متشربش.. لكن هي مكانتش بتسمع الكلام.. فطلقها في مارس 73.. وخلى بالك ديل دي هي اللي كانت نحسانا.. لانه اتجوزها بعد النكسة وطلقها في سنة الحرب..

طيب مين الجوازة الرابعة.. قالك سميرة خاشقجي.. وسميرة دي.. تبقى مرات محمد الفايد.. وام دودي الفايد اللي هيحب ديانا.. وهيموتوا الاتنين سوا في باريس.. واكيد انت عارف القصة.. فنتجاوزها..
بيقول إيهاب انه عرف سميرة من مدرسة فيكتوريا كوليدج، وكان صديق اخوها عدنان خاشقجي، واحد من اغنى اغنياء العالم، واتقابلوا في لبنان سنة 1973، خلى بالك هو لسه مطلق سنة 73.. فدي باينلها سنة الانتصارات ولا ايه..

وكانت متجوزة قبله 3 مرات، الاولى من محمد الفايد، والتانية من سفير السعودية في تركيا، والتالتة من أخو رئيس البرلمان اللبناني، وايهاب الزوج الرابع..

بيقول في فترة جوازهم قابل ابنها عماد او دودي 14 مرة.. والمشكلة اللي ادت لطلاقها كانت ان ايهاب كان مصاحب القذافي وفاتح شغل في ليبيا، وعدنان عايز يستغل علاقة ايهاب بالقذافي ويدخل يشتغل في ليبيا، فايهاب قاله هتعملي مرتب 20 الف دولار، وهتديني الطيارة بتاعتك dc9.. وهاخد واحد وربع في المية من اي عقد هتعمله في ليبيا..

والراجل لسه هيوافق، فجات سميرة، قالتلهم بتقولوا ايه.. فعدنان قالها باركي لجوزك هيشتغل معايا بفلوس كتيرة قوي، فقعدت تبكي وتقوله قول بقى انك اتجوزتني عشان تشارك عدنان انت مش بتحبني انت طمعان في فلوسي..
وقالتله لو بتحبني.. متشتغلش مع عدنان.. والمرة التانية في الخلاف كانت سنة 1974.. واحد اسمه سليم العيسى اشترى قصر واحد اسمه منصور بن سعود بن عبد العزيز، ودعاهم لافتتاح القصر، وهناك حصل خلاف كبير بينهم، وهو محبش يحكي تفاصيل الخلاف، لانها باينلها تفاصيل محرجة، لكن تم الطلاق وسابلها الحفل ومشى..

الزوجة الخامسة بقى كانت بنت من الاردن، ووخلى بالك ايهاب اتجوز اتنين من مصر منهم ماجدة، وواحدة من استراليا بتشرب كتير وبتشتم شتايم قبيحة.. وسميرة خاشقجي سعودية بس اتجوزها في لبنان، والخامسة رويدا الاردنية.. بيقولك بقى اتجوزها سنة 1974.. بشكل سري.. مفيش غير امها بس اللي كانت تعرف…

فانا بس عايز الفت انتباهك.. تعال كدا شوية.. ايهاب طلق في مارس سنة 73.. واتجوز سميرة سنة 73 وطلقها واتجوز رندة الاردنية سنة 74.. معلش يا باشا.. معلش تاني.. ربنا يديك الصحة..

بيقول إنه وقتها كان شغال مع الجيش الاردني.. بيدرب الطيارين الاردنيين.. زي ما قلتلك هو صاحب الملك وزميله في المدرسة.. يا جماعة ما حد يقدملي في المدرسة اللي بتعرف منها كل الناس الحلوة دي..

تدريبه للجيش الاردني كان على مدفع هو اشتراه للجيش، مدة المهمة كلها شهر و 22 يوم.. وكان الاتفاق إنه بعد ما يخلص مهمة التدريب.. ياخدها ويعيشوا في لندن.. لانه كان معاه بيت في لندن وحابب يعيش هناك.. بعد ما خلص المهمة، يلا يا رويدة نسافر لندن.. قالتله لا.. تعالى عيش معايا هنا انا معايا قصر وهيبقى عندنا حرس.. وهتشتغل في التجارة.. فقالها بس احنا اتفقنا تسافري معايا قالتله رجعت في كلامي.. قالها وانا الست اللي ترجع في كلامها اطلقها قبل ما نتم شهرين.. وطلقها فعلا.. وجابوا المأذون.. وهما بيضحكوا ع الجوازة اللي باظت وهي لسه في الضمان..

وفضل بعد رويدة من غير جواز لمدة سنتين، ودا بالنسباله وقت طويل طبعا.. لحد ما قابل بنت المانية امريكية.. اسمها مونيكيا… هتصدقني يا استاذ ايهاب يا طيار يا جميل انت.. انت دخلك ستات اكتر من الامم المتحدة..

البنت الالمانية اللي معاها الجنسية الامريكية اسمها مونيكا… واتعرف عليها في اليونان في حفلة عملتها شركة السياحة اللي هو مشارك فيها.. دا سنة 76.. هناك دعاها تيجي تزور مصر.. فوافقت.. وجات مصر فعرفعا على امه.. فامه قالتله ما تتجوزها يا ايهاب دي حتى بجنسيتين.. واتجوزها بس عاش معاها في بيته في امارة الشارقة من سنة 76 لحد سنة 1981.. ومن حبها فيه اشهرت اسلامها.. وكانت حياتها جميلة ومستقرة وزبادي في الخلاط.. لحد ما حد دخل حياتهم بوظها بخدعة كبيرة…

لكن زي ما انت عارف الخدع محتاجة تتحكي من اول اليوم.. وانا واكل مكرونة وعاملالي حمو.. فبكرا إن شاء الله..

#بهاء_حجازي

 

 

المخابراتي الوسيم.. إيهاب نافع الاخيرة

وقفنا السنة اللي فاتت عند الجوازة الرابعة لايهاب، لما قابل بنت المانية امريكية.. اسمها مونيكا… هتصدقني يا استاذ ايهاب يا طيار يا جميل انت.. انت دخلك ستات اكتر من الامم المتحدة..
البنت الالمانية اللي معاها الجنسية الامريكية اسمها مونيكا… واتعرف عليها في اليونان في حفلة عملتها شركة السياحة اللي هو مشارك فيها.. دا سنة 76.. هناك دعاها تيجي تزور مصر.. فوافقت.. وجات مصر فعرفعا على امه.. فامه قالتله ما تتجوزها يا ايهاب دي حتى بجنسيتين.. واتجوزها بس عاش معاها في بيته في امارة الشارقة من سنة 76 لحد سنة 1981.. ومن حبها فيه اشهرت اسلامها.. وكانت حياتها جميلة ومستقرة وزبادي في الخلاط.. لحد ما حد دخل حياتهم بوظها بخدعة كبيرة…

والحقيقة كل الناس توقعت الشخص دا غلط، لكن الشخص دا هو أبو البنت نفسها.. ايهاب سافر مع مراته لميونيخ.. وكانوا سعداء جدا.. ابو البنت قالها “المصريين دول بيطلقوا الست اول ما توصل 33 سنة”.. فالبنت اترعبت.. وفضلت خايفة من فكرة إنه يطلقها.. واول ما تمت 33 سنة راحت المجمع الإسلامي وطلبت الطلاق.. فلما سألها عن السبب قالتله بدل ما تيجي منك انت.. وحاول يقنعها أن دا هجص.. وان المصريين بيستنوا ع الست لاربعين سنة.. بس هي كان دماغها ناشفة وأصرت على الطلاق..
المهم سابها في ميونيخ ورجع القاهرة، بيقول ان كان ليه صديق اسمه سليم العيسى.. سليم قاله انت محير نفسك ليه.. فيه واحد اسمه ابونا لوقا.. دا بيفهم في الطالع اساله عن علاقتك بيها هتكمل ولا لا.. فقاله ماشي.. ساله.. فضحك جدا، وقاله يا أستاذ إيهاب:
– مراتك سابتك وأخدت فلوسك من البنك..

فاتصل بيها، وقالها يا مونيكا.. انتي عملتي ايه.. قالتله اتطلقت وخدت حقوقي.. وهدومك سايبهالك عند ابويا في ميونيخ.. ودي كانت نهاية العلاقة ما بينهم..

الجوازة السابعة كانت من فالترود بيتون ودي ارملة رأفت الهجان، وباختصار يعني رأفت مات في 30 يناير 1982.. وايهاب اتجوزها في ابريل سنة 1982… ورأفت كان موصيها انه لما يموت تتواصل مع فلان وفلا وفلان.. ومن ضمن الفلانات كان اسم ايهاب نافع.. ولما قابلته فضلت تسأله عن رأفت هو مين وازاي عاشت العمر كله في وهم.. فايهاب عشان يزيل عنها الوهم، ويرجعلها الثقة في المصريين.. راح اتجوزها .. والحقيقة ان القصة فيها تفاصيل كتير ..

وقال انها كانت بتتردد عليه كتير.. فعشان كدا اتجوزها عشان محدش يجيب سيرتها بكلمة وحشة، المهم يعني، رافت كان سايبلها ابار بترول، فهي عايزة تبيع الابار دي، فمحتاجة تعمل كشف بترولي تكلفته 261 الف دولار.. فاستلفتهم من ايهاب.. فايهاب يعني توقع انها هتخلص شغلها وترجعهمله.. لقاها قالتله معلش يا ايهاب.. الست ملزمة من جوزها.. ايوة يا ستي ملزمة ياكلك ويشربك ويكسيكي في العيد الكبير والعيد الصغير لكن مش ملزم انه يكشفلك عن البترول.. قالها هاتي الفلوس قالتله مفيش فلوس.. فراح قالها طيب انتي طالق..

بيقول ايهاب انه سافر السعودية، وراح يحج، وقعد مهموم في الكعبة، فجاله شيخ اسمه الشيخ عبد العزيز، قاله مالك يا بني، فحكاله قصته، مع مرأت رافت الهجان، فالشيخ قاله بس: “قوم اتوضى وطوف 7 مرات وروح عند حجر اسماعيل، وخد السبحة دي واقرا سورة الفيل 72 مرة.. وقول افوض امري الي الله ان الله بصير بالعباد… فاذا كنت ظلمتها فاقتص مني.. واذا كانت ظلمتني فاقتص منها.. وقارا الفاتحة“..

بيقول انه عمل كدا فعلا.. وبعدها بشهر اتصل بيه ابنها وقال امي في غيبوبة، وراح فعلا ولقاها لا حول ولا قوة ليها..

طيب المهم يا سيدي، تم الانفصال ما بينهم، هي بتقول انه نصب عليه واخد فلوسها، وهو بيقول انها خدت منه 160 الف دولار.. لكن العلم عند الله..

الزيجة التامنة كانت من بنت عندها 19 سنة، وهو كان عنده 54 سنة.. قابلها في مطعم اسمه الامم اللي بيملكه الشيخ صالح كامل صاحب قنوات اي ار تي وزوج صفاء ابو السعود.. واتجوزها في نوفمبر سنة 1989.. بيقول أن هي اللي بادرت بالكلام معاه وقالتله معجبة بيك.. وطلبت تتجوزه فاتجوزها.. فضل كام بقى الجواز دا.. هو شهر بس يا سيدي. اتجوزوا في نوفمبر واتطلقوا في ديسمبر.. طيب ايه السبب يعني.. قالك هي صغيرة فعايزة تخرج كل يوم وتسهر في الديسكو.. فهو كان بيسمع كلامها.. ودا كان بيخليه يتعب فميروحش شغله.. وبعدين طلبت منه يشغلها مضيفة في الطيران السعودي.. فكلملها حد صاحبه سعودي.. فوظفوها مضيفة في الطيران السعودي.. وبعد كدا اتطلقت..

الزوجة التاسعة كانت سنة 1990.. اتعرف عليها في موقف سيارات مستشفى السلام.. كان بيزور صديقه سيد القذافي (ابن عم القذافي).. اللي كان بيتعالج هناك.. بيقولك لقى عربية مرسيدس سادة عليه الطريق.. فبص لقاها ست.. وشبه الفنانة فريد فهمي.. اللي هي بطلة فيلم غرام في الكرنك.. فراح يسلم عليها.. فطلعت واحدة تشبهها.. ومعروف طالما الراجل نزل من العربية يبقى لازم يتجوز.. اتكلموا وطلعت اختها محجوزة في المستشفى وهي بتزورها.. وقالتله يبقى موقف تغي شيك منك يا استاذ ايهاب لو تطلع تسلم على اختي دي هتفرح جدا.. فقالها قوي قوي.. قالها تطلعي معايا قالتله لا مقدرش أصل جوزي غيور جدا ولو شافني ماشية معاك هيقت**لني طلع سلم على اختها ومشي.. تاني يوم كلمته في التليفون تشكره.. وقعدت تشتكي من جوزها إنه سُكري بيشرب سكر كتير.. فساعدها تتطلق منه.. واول ما عدت العدة.. اتجوزها.. وفضل متجوزها سبع سنين.. بس لانها كانت خايفة يحصل فيها زي ما حصل من جوزها اللي بيشرب سكر كتير.. فاداها حق تطليق نفسها.. والحقيقة الأفلام العربي زرعت في دماغ الناس أن طالما العصمة في ايد الست فالراجل مينفعش يطلق.. الحقيقة أن لما تكون العصمة في ايد الست.. فالاتنين ينفع يطلقوا بعض عادي..

واداها توكيل عام في املاكه باعتبار يعني ان جوزها بيشرب سكر كتير فدي ست حلوة ومفيش منها قلق.. لكن فوجئ انها حولت لنفسها فيلا في المعادي كان شاريها بـ 480 الف دلوقتي ميجيبوش شقة في شارع ناهيا.. مش كدا وبس.. دي خدت من خزنته 6 الاف رسوم تسجيل الفيلا باسمها.. فلما عرف واجهها.. وقالها بقى انت تعمل كدا فيا وتسيبني تسهر لياليا وتاخد الفيلا يا عينيا.. قالتله معلش انا هكتب الفيلا باسم ولادك.. فقالها لا يا هانم.. الست اللي تعمل كدا يبقى لازم ارمي عليها يمين الطلاق..

فهو يعني بيقول كدا عشان يهددها.. فلقاها راحت بعتاله هدومه في شنطة.. الاستاذ ايهاب نافع كان بيجيب منين هدوم لكل دا.. وطلقت نفسها منه واتجوزت مهندس..

والفيلا فضل نزاع قائم بينهم.. بس الست كتبتله حق انتفاع بالفيلا مدى حياته واول ما يموت تاخدها هي.. وفضل الموضوع فترة في المحاكم ومش عارف انتهى على إيه..

الست العاشرة بقى كانت من المغرب.. اتعرف عليها في مطعم سلطانة المهندسين.. انا ملاحظ ان الاستاذ ايهاب لو بياكل في بيته كان نص الجوازات دي متمتش.. قالتله معجبة فيك اوستاذ ايهاب.. وطلبت رقمه ادهولها.. وبعدين كلمته طلبت منه يعملها خدمة الا وهي طلب تحفيض في تذكرة طيران لوالدتها من مصر للطيران.. والراجل بعلاقاته راح معاها المطار وجابلها التخفيض.. جابلها التخفيض وفي ساحة المطار طلب ايدها.. يعني خدت التخفيض وخدت قسيمة جواز.. شايفين النصاحة.. بيقول انها كانت متجوزة اخو مذيعة مصرية مشهورة.. بس للاسف مقالش مين..

وراح اتجوزها بالجواز الاسترالي عشان يبقى جواز اجنبي باجنبيه ودا اسهل في الاجراءات.. انت لو مصري وهتتجوز اجنبية او العكس.. هتشوف يوم مقالكش عليه.. وانت يعني اتجوزت اجنبيه قبل كدا.. لا بس حكولي.. عشان ام احمد متابعة الصفحة وممكن تعملي مشاكل…

بيقول اكتشف انها بتنام بالنهار وبتسهر بالليل.. دا انس ابني عادي.. وبعدين بتكتب تعويذات على الحيطة.. فقالها ليه كدا يا بنتي.. فكانت بتقوله عشان متسبنيش.. وكانت بتديله فنجان اعشاب.. يشربه وينام يصحي ميلاقيهاش في البيت.. يا استاذ ايهاب ايه فيلم الرعب دا.. فضل الوضع كدا 33 يوم.. وبعدين يبدو ان الاعشاب معجبتوش..

جاله اتصال من مصدر امني رفيع جدا.. وقاله مراتك بتخرج كل يوم من الساعة 11 لـ 5 مساءا وبتلعب قمار.. في شيراتون القاهرة ومسراميس والانتر كونتينتال.. وقالوله كسبت كذا وخسرت كذا.. يعني بتلعبي قمار وعايزة تخفيض من مصر للطيران.. فواجهها بالكلام دا.. قالتله اسمه ايش بيكا تاكلنا بعينيكا.. وطلبت الطلاق.. فطلقها بعد 33 يوم..

اخر زواجة هي الزواجة11.. اتعرف عليها من خلال مستشار لشركة طيران.. وكانت مديرة مكتبه واسمها جيهان برايا… واتجوزها في 9 مايو سنة 2000 (وفضلت مراته حتى وقت كتابة المذكرات)..

فسأله كاتب المذكرات، يعني كل العلاقات دي محبتش فنانة غير ماجدة قاله لا، قاله مفيش موقف طريف ليك مع فنانة، قاله اه كنا بنصور في راس غارب في فيلم للرجال فقط، مع سعاد حسني ونادية لطفي وحسن يوسف، ومن اخراج ابن خاله محمود ذو الفقار( جوز مريم فخر الدين)، بيقول صحيت من النوم رايح اغسل وشي، فواحدة قالتلي صباح الخير، بس مردتش عليها، فمحمود قاله ليه مردتش الصباح على سعاد حسني، قاله والله ما عرفتها شكلها مختلف من غير المكياج..

المهم يعني، كدا خلصت مذكرات ايهاب نافع حسب ما رواها في كتاب لعبة الفن والمخابرات..

نيجي بقى لوفاة ايهاب نافع في 30 ديسمبر 2006، حسب ما حكته بنته جوهرة في لقاء تلفزيوني في برنامج الستات، ان ابوها اصيب بالجفاف، وكان محتاج يشرب مية كتير، لكن اصيب بالشلل الرعاش في نفس الوقت، فبقى مش قادر يمسك كوباية المية، وللاسف مكانش حد جنبه يشربه مية، فالجفاف تسببله في الخرف..

ومات وحيد في 30 ديسمبر 2006… بعد قصة حياة طويلة……….. قوي.

كاتب المذكرات ايمن الصياد، سأله، تقدر توصف حياتك بإيه يا أستاذ إيهاب، قاله: “حياتي زي موج البحر بتطلع وتنزل، لكن عمرها ما استقرت، عشت حياة الملوك، وعشت حياة الصعاليك، ركبت اعلى عربية في العالم، وعدت عليا ايام مكنتش لاقي فيها تمن العيش الحاف“..

الله يرحمه

 

أقرأ أيضا

حافظ نجيب “الثعلب”.. القصة الحقيقية لبطل مسلسل “فارس بلا جواد”